22 ივნისის მდგომარეობით, Change.org-ზე გამოქვეყნებულ პეტიციაში, 21,963 პირი მხარს უჭერს ქართულ რელიგიურ ფესტივალ ლომისობაზე ცხვრების განსაკუთრებული სისასტიკით მკვლელობის აკრძალვას.

"გვსურს გამოვხატოთ ჩვენი დამოკიდებულება იმ ექსტრემალური ბოროტების მიმართ, რომელიც რელიგიისა და კულტურის სახელით საქართველოში გამართულ ცხვრების მსხვერპლშეწირვას უკავშირდება. ცხოველების წამება და მსხვერპლშეწირვა საქართველოში გავრცელებული პრაქტიკაა, იმის მიუხედავად, რომ ქრისტიანული მოძღვრება ითვალისწინებს მათი წამების შეჩერებას" - ვკითხულობთ პეტიციაში.

ლომისობა დღეს, 22 ივნისს, მლეთაში იმართება და მასში ასობით მორწმუნე იღებს მონაწილეობას. რიტუალის დროს, ისინი შინაურ ცხოველს, უმეტესად კი ცხვარს, სწირავენ სალოცავს.

Change.org ყველას აძლევს საშუალებას დაწეროს პეტიცია და მხარდამჭერები მოიზიდოს. პეტიციაზე ხელის მოწერა ნებისმიერ მსურველს შეუძლია.