ეროსი კიწმარიშვილის ოჯახის ადვოკატმა გაგი მოსიაშვილმა On.ge-სთან საუბარში განაცხადა, რომ ის ცალსახად არ იზიარებს კიწმარიშვილის თვითმკვლელობის ვერსიას და არ ეთანხმება პროკურატურის დღევანდელ განცხადებას:

"კრიტიკულად ვუდგებით ამ საკითხს, რადგან ამისი სამართლებრივი საფუძველი გაგვაჩნია. ჩვენ არ ვფიქრობთ, რომ ეროსი კიწმარიშვილმა საკუთარი სიცოცხლე თვითმკვლელობით დაასრულა".

გაგი მოსიაშვილის თქმით, პროკურატურის შემაჯამებელი გადაწყვეტილება დამატებით კითხვის ნიშნებს აჩენს, ამას გარდა, საზოგადოებამ უნდა იცოდეს ამბის მეორე მხარე, ამიტომ ის უახლოეს მომავალში ამასთან დაკავშირებით ბრიფინგს გამართავს და მეორე მხარის მტკიცებულებებს წარმოადგენს:

"საზოგადოებას გავაცნობთ ამბავთან დაკავშირებით რა გარემოებებია, რომლებშიც არ ვეთანხმებით გამოძიებას და რა კითხვის ნიშნებია, რომლებიც ჯერ კიდევ პასუხგაუცემელი რჩება".

ეროსი კიწმარიშვილის ოჯახის ადვოკატის თქმით, პრესკონფერენცია დიდი ალბათობით ხვალ გაიმართება, ამის შესახებ მხარე საზოგადოებას გადაწყვეტილებას დღეს 5 საათზე გააცნობს.

ეროსი კიწმარიშვილის გარდაცვალების საქმეზე დღეს პროკურატურამ გამოძიება დაასრულა. პროკურატურის ვერსიით, კიწმარიშვილმა თავი მოიკლა და ის მიზანმიმართულად თვითმკვლელობამდე არავის არ მიუყვანია და არავის არ მოუკლავს.

ეროსი კიწმარიშვილი 2014 წლის 15 ივლისს თავისი ბინის ქვემოთ არსებულ ავტოფარეხში გარდაცვლილი იპოვეს. პროკურატურამ გამოძება იმავე დღეს საქართველოს სისხლის სამართლის კოდექსის 115-ე მუხლით დაიწყო, რომელიც თვითმკვლელობამდე მიყვანას გულისხმობს.