მარგო რობიმ დაადასტურა, რომ Ocean’s 11-ის მოახლოებული პრიქველი ფორმულა 1-ის წრის გვირგვინზე, მონაკოს გრან-პრიზე განვითარდება. სიუჟეტის ცენტრში არა დენი ოუშენი (თაღლითი, რომელიც ოუშენის 11 მეგობარში ლას-ვეგასის კაზინოს ძარცვას ხელმძღვანელობდა), არამედ მისი მოხერხებული მშობლები იქნებიან.

"სანამ დენი ოუშენი ვეგასში ფეხს დადგამდა, ორმა დიდოსტატმა ასწავლა მას ყველაფერი, რაც იცის, მისმა მშობლებმა", — აღნიშნა რობიმ CinemaCon-ზე, Warner Bros.-ის 2027 წლის გეგმების პრეზენტაციისას. "თქვენ მათ ძლიერების პიკში ნახავთ. ჩვენს ახალ ფილმში ისინი ეპიკურ ძარცვას 1962 წლის მონაკოს გრან-პრიზე მოაწყობენ".

დენი ოუშენის მშობლების როლს, სავარაუდოდ, ბრედლი კუპერი და მარგო რობი შეასრულებენ

ფოტო: Getty Images

ფილმში მთავარ როლებს მარგო რობი და ბრედლი კუპერი ასრულებენ. სავარაუდოდ, სწორედ ისინი განასახიერებენ დენი ოუშენის დედ-მამას (შეგახსენებთ, რომ სტივენ სოდერბერგის 2001 წლის ფილმში დენის როლს ჯორჯ კლუნი ასრულებდა). რობის პრიქველისგან დამოუკიდებლად, კლუნიც აცოცხლებს ორიგინალ ტრილოგიას ახალი სიქველით, რომელშიც ჯულია რობერტსი, მეთ დეიმონი, ბრედ პიტი და დონ ჩიდლი ბრუნდებიან. ისინი კვლავ გაერთიანდებიან ძარცვისთვის, როგორც უკვე ასაკში შესული კრიმინალები.

კუპერი პრიქველის რეჟისორიც არის. მან პროექტში ლი ისააკ ჩუნგი და ჯეი როუჩი ჩაანაცვლა. პარალელურად, რობი ფილმის პროდიუსერია საკუთარი კომპანიით LuckyChap. სცენარზე კერი სოლომონი მუშაობს. ოუშენის თავგადასავალზე, რომელსაც ჯერ ოფიციალური სათაური არ აქვს, გადაღებები წელს დაიწყება, ეკრანებზე კი 2027 წელს გამოვა.

Warner Bros.-მა 2027 წლის სხვა პროექტებიც წარადგინა, მათ შორის: Minecraft-ის ფილმი 2, მელისა მაკკარტის საშობაო კომედია მარჯი კლაუსი და სამეცნიერო ფანტასტიკური თრილერი Shiver კიანუ რივზის მონაწილეობით. მანამდე კი სტუდია გეგმავს ტომ კრუზის Digger-ის, დენი ვილნევის დიუნი: ნაწილი III, DC-ის სუპერგოგონას და ნიკოლ კიდმანისა და სანდრა ბულოკის პრაქტიკული მაგია 2-ის გამოშვებას.

Warner Bros.-ისთვის 2025 წელი საკმაოდ წარმატებული აღმოჩნდა: ზედიზედ შვიდი ფილმის პრემიერამ 40 მილიონ დოლარზე მეტი შემოსავალი მოიტანა, მათ შორის იყო Sinners, Weapons და Minecraft-ის ფილმი. ამ ფილმებმა გლობალურ გაქირავებაში ჯამში 4.4 მილიარდი დოლარი დააგროვეს: ეს პირველი შემთხვევაა 2019 წლის შემდეგ, როცა სტუდიამ ამ ნიშნულს მიაღწია.

"ეს შედეგი ადასტურებს მარტივ, მაგრამ ძლიერ ჭეშმარიტებას", — განაცხადა სტუდიის თანათავმჯდომარემ, მაიკ დე ლუკამ CinemaCon-ის სცენიდან — "როდესაც უშიშრად ქმნი მრავალფეროვან გეგმას, რომელიც დიდ ფილმებს ეფუძნება, აუდიტორია გამოიღვიძებს კოვიდისდროინდელი ჰიბერნაციიდან და კინოთეატრებში მოვა".