უნგრეთის არჩეული პრემიერმინისტრის, პეტერ მადიარის გადაწყვეტილებით, ქვეყნის ბიუჯეტიდან აღარ გამოიყოფა თანხები კონსერვატიული პოლიტიკური მოქმედების კონფერენციის (CPAC) და მასთან დაკავშირებული ორგანიზაციების მხარდასაჭერად. მადიარი ორბანის ხელისუფლების მიერ ამ მიმართულებით გადახარჯულ თანხებს დანაშაულად მიიჩნევს.

"სახელმწიფო ამ ყველაფერს აღარ დააფინანსებს, არც CPAC-ის ღონისძიებას და არც მათიას კორვინუსის კოლეგიუმსა და მასთან დაკავშირებულ სხვა ინსტიტუტებს. მიმაჩნია, რომ სახელმწიფოს ისინი თავიდანვე არ უნდა დაეფინანსებინა, ეს დანაშაული იყო," — განაცხადა მადიარმა.

ახალი პრემიერმინისტრი მიანიშნებს, რომ ვიქტორ ორბანის ადმინისტრაცია საბიუჯეტო რესურსებს პარტიული ინტერესებისთვის იყენებდა, რაც სამართლებრივ რეაგირებას საჭიროებს.

"სახელმწიფო ბიუჯეტიდან სამთავრობო ხარჯებში პარტიული დაფინანსების არევა, ჩემი აზრით, სისხლის სამართლის დანაშაულია და ეს მომავალმა სამართალდამცავმა ორგანოებმა უნდა გამოიძიონ, მათ შორის, სახელმწიფო აქტივების აღდგენისა და დაცვის ეროვნულმა სამსახურმაც, ვინაიდან საბიუჯეტო თანხები პარტიული ღონისძიებების დასაფინანსებლად განკუთვნილი არ იყო," — განმარტავს ის.

მიუხედავად იმისა, რომ CPAC-ისთვის ბუდაპეშტის კარი არ იხურება, მადიარი კატეგორიულად გამორიცხავს ხარჯების ხალხის ჯიბიდან დაფარვას:

"ძალზე მისასალმებელია, მაგრამ ეს უნგრელი გადასახადების გადამხდელთა ფულით არ უნდა დაფინანსდეს, არამედ Fidesz-ის ხარჯით, ან ვიქტორ ორბანის დამქაშების ფულით, სანამ ამ თანხას უკან არ დავიბრუნებთ", — თქვა მადიარმა.

შეგახსენებთ, რომ უნგრეთში გამართულ CPAC-ის კონფერენციებს წლების განმავლობაში ქართული ოცნების ლიდერებიც სტუმრობდნენ. 2023 წელს ღონისძიებაში მონაწილეობა ირაკლი ღარიბაშვილმა მიიღო, ხოლო შემდგომ წლებში ბუდაპეშტში სიტყვით ირაკლი კობახიძე გამოდიოდა.