სურსათის ეროვნული სააგენტოს ცნობით, ზუგდიდიდან ქუთაისის თავშესაფარში გადაყვანილ 17 მიუსაფარ ძაღლს ზუგდიდში დააბრუნებენ, 5-ს — აბაშაში, 3-ს — ვანში. ამას გარდა, სააგენტო აქვეყნებს დღეს, 3 აპრილს დაგეგმილი შინაური ცხოველების ჰიპერპოპულაციის მართვის პროგრამით გათვალისწინებული ღონისძიებების განხორციელების არეალს.

"შინაური ცხოველების ჰიპერპოპულაციის მართვის პროგრამის ფარგლებში, ვეტერინარული მანიპულაციების ჩატარების მიზნით ზუგდიდიდან ქუთაისის თავშესაფარში გადაყვანილი ცხოველებიდან თავშესაფარში დარჩენილია მხოლოდ 17, რომლებსაც დღეს, 3 აპრილს, ზუგდიდში დააბრუნებენ. ზუგდიდის გარდა ძაღლები პირვანდელ გარემოს დაუბრუნდებიან აბაშაში (5 ძაღლი) და ვანში (3 ძაღლი).

ამავდროულად, სურსათის ეროვნული სააგენტო, შემუშავებული სამოქმედო გეგმის შესაბამისად, ადგილობრივ მუნიციპალიტეტებთან შეთანხმებით, აგრძელებს პროგრამით გათვალისწინებული ღონისძიებების განხორციელებას. სააგენტო წინასწარ აქვეყნებს სამოქმედო არეალების კოორდინატებს და დროს:

• 03.04. იმერეთი, ზესტაფონი, მერიის მიმდებარე ტერიტორია, 10:00 საათი;
• 03.04. იმერეთი, სამტრედია, მერიის მიმდებარე ტერიტორია, 09:30 საათი;
• 04.04. კახეთი, ყვარელი, მერიის მიმდებარე ტერიტორია, 10:30 საათი;
• 04.04. იმერეთი, ქუთაისი, მერიის მიმდებარე ტერიტორია, 10:30 საათი;
• 06.04. იმერეთი ჭიათურა, მერიის მიმდებარე ტერიტორია, 11:00 საათი;
• 06.04. კახეთი, სიღნაღი, მერიის მიმდებარე ტერიტორია, 11:00 საათი;
• 07.04. კახეთი, სიღნაღი, წნორის ცენტრი, 11:00 საათი;
• 07.04. იმერეთი, წყალტუბო, მერიის მიმდებარე ტერიტორია, 11:00 საათი.

სააგენტო მოუწოდებს ცხოველების მიმკედლებლებს, ასევე ცხოველების მოყვარულებს, აღნიშნულ ლოკაციებზე მიიყვანონ ცხოველები, სადაც მათ, საჭიროების მიხედვით, ადგილზე ჩაუტარდებათ ცოფის საწინააღმდეგო ვაქცინაცია. ის ცხოველები, რომლებსაც არ აქვთ ჩატარებული კასტრაცია/სტერილიზაცია, პასუხისმგებელ პირთან (მიმკედლებელი, ცხოველის მოყვარული) შეთანხმებით, შესაბამისი აქტის შედგენის საფუძველზე, გადაყვანილი იქნებიან თავშესაფარში. შესაბამისი მანიპულაციების ჩატარება-რეაბილიტაციის გავლის შემდეგ, ცხოველები აყვანის ლოკაციაზე დაუბრუნდებიან პასუხისმგებელ პირებს, ასევე, შესაბამისი აქტის შედგენით.

თუ მითითებულ ლოკაციაზე ვერ ხერხდება ცხოველების მიყვანა, რამდენიმე მიმკედლებელს შეუძლია მიმართოს სააგენტოს. ეკიპაჟები მივლენ და უზრუნველყოფენ", — წერს სეს გავრცელებულ ინფორმაციაში.