აფხაზეთის ე.წ. ფეხბურთის ფედერაციამ ფეხბურთის ასოციაციათა საერთაშორისო ფედერაციას (ფიფას) მიმართა, რათა აფხაზეთის ე.წ. ეროვნული ნაკრები ორგანიზაციის წევრად მიიღოს. ამის შესახებ წერს Sputnik.

ე.წ. ფეხბურთის ფედერაციის პრეზიდენტის, ჯუმა კვარაცხელიას განცხადებით, აფხაზეთის საფეხბურთო ინფრასტრუქტურის შემოწმება ფიფას ConIFA-ს ჩემპიონატისას შეეძლო.

ConIFA არის არაღიარებული ქვეყნების მსოფლიო ჩემპიონატი ფეხბურთში. ჩემპიონატი პირველად 2014 წელს ჩატარდა და იგეგმება, რომ ორ წელიწადში ერთხელ უნდა გაიმართოს. პირველი ჩემპიონატის გამარჯვებული აფხაზეთის დე-ფაქტო რესპუბლიკა გახდა.

"ფიფას ოთხი წარმომადგენელი იყო ჩვენთან. პრინციპში, ორგანიზაციაში გაწევრიანების გზა გრძელია, მაგრამ მგონია, რომ ამ საკითხს განიხილავენ. კოსოვოს ნაკრები მიიღეს, მგონია, ჩვენი საკითხიც დადებითად გადაწყდება", - განაცხადა ე.წ. ფედერაციის პრეზიდენტმა.

კვარაცხელიას თქმით, ფიფაში გაწევრიანებას საქართველოს ფეხბურთის ფედერაცია უშლის ხელს. მისი განცხადებით, ყველა წინააღმდეგობის მიუხედავად აფხაზეთის ეროვნული ნაკრები ორგანიზაციის წევრი გახდება:

"ჩვენ ვართ დამოუკიდებელი ქვეყანა. ჩვენ ვალდებულნი ვართ მათ მივწეროთ და თვალში მოვხვდეთ".