პარტია "ერი და სახელმწიფოს" დამფუძნებელი ზვიად ტომარაძე კახა კალაძის ბანერზე წარწერის გამო ელენე ხოშტარიასთვის წელიწადნახევრიანი პატიმრობის განაჩენს ეხმაურება. ის წერს, რომ ელენე ხოშტარიას მიმართ ნეგატიურადაა განწყობილი, "თუმცა მისი დამოკიდებულება ერთია და სამართლიანობა მეორე" და მიუღებლად თვლის საარჩევნო ბანერზე წარწერის გამო ადამიანს 1,6 წელი ციხე მიესაჯოს.

ის ბათუმელების და ნეტგაზეთის თანადამფუძნებლის, მზია ამაღლობელის განაჩენსაც ეხმაურება და აღნიშნავს, რომ " მიუღებელია პოლიციელზე სილის გაწვნის გამო ქალს 2 წელი ციხე მიუსაჯო".

"როგორც ქართველი პოლიტიკოსების უმრავლესობის, ასევე ელენე ხოშტარიას მიმართ ნეგატიურად ვარ განწყობილი, თუმცა ჩემი დამოკიდებულება ერთია და სამართლიანობა მეორე, მიუღებელია საარჩევნო ბანერზე წარწერის გამო ადამიანს 1,6 წელი ციხე მიუსაჯო.

მზია ამაღლობელის გამოცემას ჩემი საკანონმდებლო საქმიანობის დროს ალბათ უარყოფითად თუ დაუწერია რამე, მიუხედავად ამისა, სამართლიანობა მოითხოვს აღვნიშნო, რომ მიუღებელია პოლიციელზე სილის გაწვნის გამო ქალს 2 წელი ციხე მიუსაჯო. რა თქმა უნდა, ეს იმას არ ნიშნავს, რომ ვისაც მოესურვება პოლიციელს ფიზიკურად გაუსწორდეს, მაგრამ სასჯელი დანაშაულის ადეკვატური უნდა იყოს და ამ შემთხვევაში საკმარისი იქნებოდა რამდენიმე ათასლარიანი ჯარიმა, 15-დღიანი პატიმრობით.

ვისაც კოვიდის დროს ჩემს მიერ ჩატარებული 14 აქცია გახსოვთ, იცით რომ არცერთი ინციდენტი ან დაპირისპირება არ მომხდარა და შესაბამისად, ვერ მომეწონებოდა პოლიციის მისამართით ნასროლი პიროტექნიკა და ქვები, თუმცა აქაც სამართლიანობის გათვალისწინებით, თუ ამ აქციების დროს დამნაშავე ახალგაზრდებს აპატიმრებ, მაშინ ის "სამართალდამცავებიც" უნდა დააკავო, რომლებიც ხალხს წიხლებით შესდგნენ და ქუჩა–ქუჩა სდიეს
... ისიც გასათვალისწინებელია, რომ დაკავებული ახალგაზრდების უმრავლესობას ვერც ბრალი დაუმტკიცეს და ვერც მოწმეებმა ამოიცნეს...
სადღა გვაქვს სახელმწიფო, მაგრამ თუ გვინდა რომ გვქონდეს, უპირველესი ფუნდამენტი სამართალია და არა საკუთარი ვიწრო გადმოსახედიდან მოწონება – არ მოწონებით გამოვიტანოთ განაჩენი...", — წერს ზვიად ტომარაძე.

შეგახსენებთ, რომ 14 სექტემბერს, პარტია დროას ლიდერმა, ელენე ხოშტარიამ კახი კალაძის ბანერზე დააწერა "რუსული ოცნება". ოპოზიციონერი ლიდერი 2025 წლის 15 სექტემბერს დააკავეს. პროკურატურა ხოშტარიას სხვისი ნივთის განზრახ დაზიანების ბრალდებით, 570 ლარის ოდენობის ზიანს ედავებოდა. მას თავდაპირველად 5 000-ლარიანი გირაო შეეფარდა, რის გადახდაზეც ხოშტარიამ უარი განაცხადა. დღეს, 24 მარტს, მოსამართლე გიორგი არევაძემ 1 წლითა და 6 თვით თავისუფლების აღკვეთა მიუსაჯა.