რუსეთის პრეზიდენტის სპეციალური წარმომადგენელი საერთაშორისო კულტურული თანამშრომლობის საკითხებში მიხაილ შვიდკოი სრულიად საქართველოს კათოლიკოს-პატრიარქის ილია II-ის დაკრძალვას დაესწრო, — ამის შესახებ ცნობას რუსეთის საგარეო საქმეთა სამინისტრო ავრცელებს. უწყების ცნობით, შვიდკოიმ რუსეთის ლიდერის, ვლადიმერ პუტინის ღრმა სამძიმარი გადასცა საქართველოს სასულიერო პირებსა და ხალხს.

მანამდე შვეიცარიის საელჩოში რუსეთის ინტერესების სექციამ გაავრცელა რუსეთის პრეზიდენტის, ვლადიმერ პუტინის სამძიმარი, სადაც ნათქვამია, რომ "რუსეთის პრეზიდენტის, ვლადიმერ პუტინის სახელით, სამძიმრისა და მხარდაჭერის სიტყვები გადაეცა საქართველოს მართლმადიდებლური ეკლესიის საპატრიარქო ტახტის მოსაყდრეს, სენაკისა და ჩხოროწყუს მიტროპოლიტ შიოს და მთელ ქართველ ხალხს".

სრულიად საქართველოს კათოლიკოს-პატრიარქი ილია მეორე დღეს, 22 მარტს სიონის საკათედრო ტაძარში დაკრძალეს. ის 17 მარტს, 93 წლის ასაკში გარდაიცვალა.