სომხეთის პრემიერმინისტრმა ნიკოლ ფაშინიანმა მოსახლეობა გააფრთხილა, რომ ქვეყანა შესაძლოა გარდაუვალი ომის წინაშე აღმოჩნდეს, თუ მომავალ საპარლამენტო არჩევნებში "საზღვარგარეთიდან მართული" ოპოზიციური ძალები გაიმარჯვებენ. ამის შესახებ ინფორმაციას ArmenPress ავრცელებს.

კონკრეტული პარტიების დასახელების გარეშე ფაშინიანმა აღნიშნა, რომ გარკვეული ჯგუფები ახლახან დამყარებული მშვიდობის "გადახედვას" ცდილობენ. ბრიფინგზე პრემიერმა განაცხადა, რომ მოელის თავისი პარტიის, "სამოქალაქო ხელშეკრულები", მიერ ხმების იმ რაოდენობის მოპოვებას, რაც საპარლამენტო უმრავლესობის ჩამოსაყალიბებლად არის საჭირო. ეს კი, მისი თქმით, რეგიონული მშვიდობის პროცესებს სრულიად შეუქცევადს გახდის.

"ჩვენ ამ არჩევნების შედეგად კონსტიტუციური უმრავლესობის მოპოვებას ვგეგმავთ, რადგან სწორედ ეს იქნება გარანტია იმისა, რომ, განსაკუთრებით რეგიონული მშვიდობის კონტექსტში, პროცესებს სრულად შეუქცევადს გავხდით," — განაცხადა პრემიერმინისტრმა.

ფაშინიანმა გარკვეული ოპოზიციური ძალები აზერბაიჯანთან ახალი ომის მომზადებაში დაადანაშაულა. მან აღნიშნა, რომ ამ ძალების ნაწილს საერთოდ არ ესმის რას ამბობენ, რადგან მათი განცხადებები სხვაგან იწერება და ისინი მათ უბრალოდ კითხულობენ.

"ეს პარტიები და წრეები ჯერ ამბობენ, რომ მშვიდობის წინააღმდეგნი არ არიან, შემდეგ კი აცხადებენ, რომ ხელისუფლებაში მოსვლის შემთხვევაში მშვიდობის გადახედვას დაიწყებენ. ყოველგვარი შელამაზების გარეშე მინდა ვთქვა, რომ ეს არის ომი — სომხეთისთვის ეს ნიშნავს არა მხოლოდ ტერიტორიების, არამედ სუვერენიტეტის დაკარგვასაც.

ზოგს მათგანს, როგორც ჩანს, არც კი ესმის, რას ამბობს, რადგან ჩემთვის აშკარაა, რომ ტექსტები, რომლებსაც ისინი წარმოთქვამენ, ყოველ შემთხვევაში, ნაწილი მაინც, სხვაგან იწერება. ძალებსა და პოლიტიკოსებს, რომლებსაც არ ესმით საკუთარი ნათქვამი, რა თქმა უნდა, არ უნდა ჰქონდეთ სომხეთში რაიმე ოფიციალური სტატუსზე პრეტენზია.

ყველა ეს ძალა მშვიდობის გადახედვის პოზიციაზე დგას, რაც გარდაუვლად ნიშნავს ომს — სავარაუდოდ არჩევნების დასრულებისთანავე, ყველაზე გვიან კი შემოდგომისთვის. მე ხომ ვაანალიზებ მათ ნათქვამს? საჭიროების შემთხვევაში, შემიძლია ყველა მათგანი ნათლად დავასახელო. ვვარაუდობ, რომ ზოგს არც კი ესმის, რას ამბობს, მაგრამ ისინი ამზადებენ ახალ სექტემბრის ომს — სერიოზული შედეგებით," — განაცხადა ფაშინიანმა.

კითხვაზე, თუ რატომ სურთ ამ ძალებს ახალი ომის პროვოცირება, ფაშინიანმა უპასუხა, რომ მათი მიზანი სომხეთის პერიფერიულ მდგომარეობაში შენარჩუნებაა. მისივე განმარტებით, მშვიდობის გადახედვის ნებისმიერი მცდელობა დაუყოვნებლივ ომს ნიშნავს.

"მიზანი ძალიან მარტივია: მათი ამოცანაა სომხეთის პერიფერიულ მდგომარეობაში შენარჩუნება, როგორც ეს მათი მმართველობის დროს იყო. ისინი ხედავენ, რომ სომხეთი დამოუკიდებელი გახდა და ეს მათთვის პრობლემაა, რადგან გადაწყვეტილი აქვთ, სომხეთს დამოუკიდებლობის საშუალება არ მისცენ... მშვიდობის გადახედვის ნებისმიერი მცდელობა ნიშნავს ომს — დაუყოვნებლივ! ან როცა ამბობენ: "არარატი ჩვენია", "დადივანქი ჩვენია" — ეს ომია!", — განაცხადა ფაშინიანმა.