ესპანეთის ხელისუფლება კატალონიისთვის ავტონომიის სტატუსის შეჩერებას შაბათს დაიწყებს და პირდაპირი მმართველობა მადრიდის ხელში გადავა. მთავრობის კაბინეტი კონსტიტუციის 155-ე მუხლის შესაბამისად იმოქმედებს.

ეს განცხადება მოჰყვა კატალონიის ლიდერის, კარლეს პუჩდემონის წერილს, რომელიც მან პრემიერ-მინისტრ მარიანო რახოის მისწერა. პუჩდემონი წერს, რომ რეგიონის პარლამენტი ოფიციალურად უყრის კენჭს დამოუკიდებლობას თუ მადრიდი მოლაპარაკებების მაგიდას არ მიუჯდება და "რეპრესიებს" გააგრძელებს.

ესპანეთის პრემიერ-მინისტრმა, მარიანო რახოიმ კატალონიის ლიდერს ხუთშაბათამდე მისცა ვადა, რათა დამოუკიდებლობის გამოცხადებაზე უარი ეთქვა, წინააღმდეგ შემთხვევაში, ცენტრალური ხელისუფლება კონსტიტუციის 155-ე მუხლის შესაბამისად მოქმედებას დაჰპირდა.

155-ე მუხლი, რომელიც 1978 წელს მიიღეს, მადრიდს უფლებას აძლევს, რომ კრიზის სიტუაციაში პირდაპირი მმართველობა გამოიყენოს. დემოკრატიული ესპანეთის არსებობის განმავლობაში ეს მუხლი არასდროს გამოყენებულა.

კატალონიაზე მმართველობის ძალაუფლების მადრიდისთვის გადაცემა ესპანეთის სენატმა უნდა განიხილოს, რომლის უმრავლესობას რახოის სახალხო პარტია წარმოადგენს. ცენტრალურ ხელისუფლებას ექნება შესაძლებლობა გააკონტროლოს რეგიონის პოლიცია და ვადამდელი არჩევნებიც ჩაატაროს. თუმცა როგორც ადგილობრივი მედია ამბობს, ვადამდელი არჩევნების საკითხი ჯერ არ განიხილება.

კატალონიის დამოუკიდებლობის შესახებ პირველი ოქტომბრის რეფერენდუმი, რომელსაც არ აღიარებს მადრიდი და არც ევროკავშირი, ჯერ კიდევ ჩატარებამდე გამოაცხადა არაკონსტიტუციურად ესპანეთის საკონსტიტუციო სასამართლომ. ესპანეთის ერთიანობას დაუჭირეს მხარი გერმანიამ და საფრანგეთმა.