ყოფილი სახალხო დამცველი უჩა ნანუაშვილი სუს-ში დაიბარეს. ამის შესახებ ის სოციალურ ქსელში წერს. როგორც უფლებადამცველი განმარტავს, მისი უწყებაში დაბარების მიზეზი ეუთოს მოსკოვის მექანიზმის ექსპერტთან კომუნიკაციაა.

"სუს-მა უფლებადამცველების დევნა განაახლა!

გუშინ საღამოს დამირეკა სახელმწიფო უსაფრთხოების სამსახურის გამომძიებელმა, დაბარებული ვარ ეუთოს მოსკოვის მექანიზმის ექსპერტთან კომუნიკაციის საკითხზე, როგორც მივხვდი, ტელეეთერით დავით ქაცარავამ გახსენათო. ეუთოს ექსპერტთან კომუნიკაცია თურმე უფლებადამცველების გვეკრძალება? მოსკოვის მექანიზმი როგორც ჩანს ძალიან აღელვებთ", — წერს სოციალურ ქსელში ყოფილი სახალხო დამცველი, უფლებადამცველი უჩა ნანუაშვილი.

ცნობისათვის, დავით ქაცარავამ, "ტვ პირველის" ეთერში "მოსკოვის მექანიზმზე" საუბრისას თქვა, რომ უჩა ნანუაშვილი დაჰპირდა, რომ "მოსკოვის მექანიზმის" ფარგლებში მოწმედ გამოიკითხებოდა, თუმცა, შემდეგ არავინ დაკავშირებია.

"მე მქონდა ერთ ეტაპზე საუბარი უჩა ნანუაშვილთან, რომელმაც მითხრა, რომ "მოსკოვის მექანიზმის" ფარგლებში მოხდებოდა ჩემი გამოკითხვა, თუმცა, შემდეგ არავინ დამკავშირებია", — განაცხადა ქაცარავამ.