ჭიათურელი მაღაროელები, ჭიათურაში არსებული ვითარებასთან დაკავშირებით, ირაკლი კობახიძეს და მარიამ ქვრივიშვილს საჯარო დებატებში იწვევენ

"არგუმენტირებულ საჯარო დებატებში ვიწვევთ პრემიერ მინისტრს და ეკონომიკის მინისტრს. სადებატო თემა — ჭიათურაში არსებული ვითარება.
გპირდებით ღირსეულ ოპონირებას, უამრავ არგუმენტს და ფაქტს, თუ რა მდგომარეობაშია ჭიათურა.

ჩვენ 1 წელზე მეტია სამართლიან, უწყვეტ პროტესტში ვართ. ჩვენი მიზანია დეტალურად გიამბოთ, რა შედეგები მოჰყვა თქვენს ეკონომიკურ თუ პოლიტიკურ გადაწყვეტილებებს.
ასევე გვაინტერესებს, იღებთ თუ არა პოლიტიკურ პასუხისმგებლობას აქ გამეფებულ უსამართლობასა და კორუფციაზე.

მივმართავთ ტელევიზიებს რუსთავი 2-ს, იმედს, პირველ არხს" — უზრუნველყავით ეს დებატები," — ვკითხულობთ "მაღაროელის" განცხადებაში.

ამას გარდა, 19 მარტს, 13:00 საათზე, ჭიათურელი მაღაროელები პროკურატურასთან აქციას გამართავენ. "მაღაროელის" გავრცელებულ განცხადებაში ვკითხულობთ, რომ უწყების შენობასთან 4 ჭიათურელი მაღაროელის უკანონო პატიმრობას გააპროტესტებენ და ჭიათურაში სახელმწიფო აუდიტის მიერ გამოვლენილი მნიშვნელოვანი დარღვევების და კორუფციული სქემების გამოძიებას მოითხოვენ.