ბელგიის ქალაქ ლიეჟში სინაგოგასთან აფეთქება მოხდა. ბელგიის პოლიციის ინფორმაცით, შემთხვევის შედეგად არავინ დაშავებულა, თუმცა სინაგოგის და ქუჩის მოპირდაპირე მხარეს მდებარე შენობის ფანჯრები ჩაიმსხვრა.

ლიეჟის მერმა, უილი დემეიერმა მომხდარი "ანტისემიტურ აქტად შეაფასა" და დასძინა, რომ "არ შეიძლება, გარე კონფლიქტები ჩვენს ქალაქში შემოიტანონ" და აშშ-ის და ისრაელის ირანთან ომზე მიანიშნა.

ბელგიის შინაგან საქმეთა მინისტრმა, ბერნარ კენტენმა განაცხადა, რომ სინაგოგის წინ აფეთქება "მძიმე ანტისემიტური აქტია, რომელიც პირდაპირ იყო მიმართული ბელგიის ებრაულ საზოგადოებაზე".

მინისტრის განცხადებით, ფედერალურმა პროკურატურამ გამოძიება დაიწყო და მსგავსი ობიექტების გარშემო უსაფრთხოების ზომების გაძლიერება დაანონსა.

"ანტისემიტიზმი არის თავდასხმა ჩვენს ღირებულებებსა და საზოგადოებაზე. მასთან ბრძოლა ერთმნიშვნელოვანი უნდა იყოს. ჩვენ ლიეჟის და მთელი ქვეყნის ებრაულ საზოგადოებას სოლიდარობას ვუცხადებთ," — დაწერა ბელგიის პრემიერინისტრმა ბარტ დე ვევერმა X-ზე.

სინაგოგა 1899 წელს გაიხსნა და ბელგიის სამხრეთ ფრანკოფონურ რეგიონში — ვალონიაში — ისტორიულ ძეგლად არის გამოცხადებული. შენობაში ლიეჟის ებრაული საზოგადოების მუზეუმი ფუნქციონირებს.