ინგლისელი მომღერლისა და One Direction-ის ყოფილი წევრის, ლიამ პეინის, გარდაცვალების შესახებ ჰარი სტაილსმა საჯაროდ პირველად ისაუბრა. Apple Music-თან ინტერვიუში სტაილსმა აღნიშნა, რამდენად გაუჭირდა ამ ამბის აღქმა და ისაუბრა, რა მოლოდინები ჰქონდა საზოგადოებას მისგან, კერძოდ, როგორ უნდა იგლოვოს ადამიანმა მეგობრის გარდაცვალება.

"გულწრფელად რომ გითხრათ, ამაზე საუბრის იდეასთანაც კი ცოტათი მიჭირს შეგუება. მგონია, რომ მისი გარდაცვალების შემდეგ იყო პერიოდი, როდესაც ძალიან მიჭირდა იმის აღიარება, თუ რა უცნაურია, როდესაც შენს მწუხარებას სხვებიც ითვისებენ", — განუცხადა სტაილსმა Apple Music-ს.

პეინი 31 წლის ასაკში, 2024 წლის 16 ოქტომბერს, სასტუმროს მესამე სართულის ფანჯრიდან გადავარდნის შედეგად დაიღუპა. მისი ტრაგიკული გარდაცვალების შემდეგ, სოციალურ ქსელებში One Direction-ის ყველა წევრმა გამოხატა მწუხარება. მოგვიანებით, ბენდმა ინსტაგამზე საერთო პოსტიც კი გამოაქვეყნა.

"ძალიან რთულია ისეთი მეგობრის დაკარგვა, რომელიც შენ ასე ძალიან გგავს", — ამბობს სტაილსი.

აღსანიშნავია, რომ სტაილსს ამ თემაზე საჯაროდ აქამდე არ უსაუბრია, განსხვავებით ბენდის სხვა წევრებისაგან. 2024 წლის ნოემბერში ზეინმა გარდაცვლილ მეგობარს სიმღერა სახელწოდებით iT’s YoU მიუძღვნა. "ლიამ, იმედია ამას ხედავ, ეს სიმღერა შენ გეძღვნება", — თქვა ზეინმა კონცერტზე. რაც შეეხება ლუი ტომილსონს, ამ უკანასკნელმა პეინზე გასულ წელს, Rolling Stones-სთან ინტერვიუში ისაუბრა.

ფოტო: The Independent

სტაილსმა ინტერვიუში თავის ახალ ალბომზეც — Kiss All the Time. Disco, Occasionally. — ისაუბრა. მისი თქმით, ამ ალბომის შექმნა მეგობრის გარდაცვალებით გამოწვეული მწუხარების შემდეგ გადაწყვიტა.

"ჩემთვის ეს ძალიან მნიშვნელოვანი მომენტი იყო იმ თვალსაზრისით, რომ საკუთარ ცხოვრებას სხვა თვალით შევხედე და შევძელი მეთქვა: 'კარგი, რისი გაკეთება მინდა ცხოვრებაში? როგორ მინდა ვიცხოვრო?" — დასძინა სტაილსმა — "ვფიქრობ, გარდაცვლილი მეგობრების პატივისცემის საუკეთესო გზა საკუთარი ცხოვრების სრულფასოვნად გაგრძელებაა".

რაც შეეხება სტაილსის ახალ ალბომს, მუსიკოსის მეოთხე სტუდიური ალბომი 12 სიმღერისგან შედგება და მისი აღმასრულებელი პროდიუსერი კიდ ჰარპუნია. ჰარის გულშემატკივრები ალბომის მოსმენას 6 მარტს შევძლებთ, მანამდე კი შეგიძლიათ მოუსმინოთ ალბომში შემავალ პირველ სინგლს, სახელწოდებით Aperature.