ახალშობილის მდგომარეობა, რომლის მკვლელობაც კლინიკა “მედინას“ სანიტარმა, ამავე კლინიკის საპირფარეშოში სცადა, მძიმედ ფასდება, თუმცა ცოტა გაუმჯობესება აქვს. ამის შესახებ „ინტერპრესნიუსს“ კლინიკის დირექტორმა, ჯუმბერ უნგიაძემ განუცხადა. მისი თქმით, ახალშობილის გადარჩენას სხვადასხვა პროფილის სპეციალისტები ცდილობენ.

რაც შეეხება დედას, მისი მდგომარეობა სტაბილურია და ის ასევე კლინიკაში რჩება.

"ახალშობილის მდგომარეობა ძალიან მძიმედ ფასდება. ცოტა გაუმჯობესება აქვს. პირველადი ოპერაცია ჩაუტარდა და ახლა რეანიმაციული ღონისძიება მიმდინარეობს. ქალაქ თბილისიდან ყველა წამყვანი სპეციალისტი ჩართულია. დღეს ჯანდაცვის სამინისტროს კონსილიუმი გვქონდა, სხვადასხვა სპეციალისტებით ჩაერთნენ, ეტაპობრივად, რაც საჭიროა — უკეთდება. ბავშვის თბილისში გადაყვანა არ იგეგმება, რადგან არატრანსპორტაბელურია. ახალშობილის დედის მდგომარეობა დამაკმაყოფილებელია და კლინიკაში რჩება", — განუცხადა ჯუმბერ უნგიაძემ ინტერპრესნიუსს.

გავრცელებული ინფორმაციით, ბათუმის ერთ-ერთ კლინიკაში თანამშრომელმა საპირფარეშოში გუშინ იმშობიარა და შემდეგ, როგორც კლინიკა "მედინას" კლინიკური დირექტორი ექიმი ჯუმბერ უნგიაძე "ტვ პირველთან" ამბობს, ახალშობილს ყელი "გამოღადრა".