Netflix-მა საკულტო სერიალის გაგრძელების, Peaky Blinders: The Immortal Man-ის პირველი ოფიციალური ტრეილერი გამოუშვა. ფილმის მთავარი პერსონაჟის, ტომი შელბის, როლს კვლავ ოსკაროსანი მსახიობი — კილიან მერფი შეასრულებს.

როგორც ტრეილერიდან ირკვევა, პროექტში ბარი კეოგანსაც ვიხილავთ. ბარი ფილმში ტომის უკანონო შვილის, დიუკ შელბის როლს ითამაშებს, რომელიც ამჟამად Peaky Blinders-ის ჯგუფს უდგას სათავეში.

ფოტო: Netflix

ფილმში მოქმედება მეორე მსოფლიო ომის დროს, ქაოსით მოცულ ინგლისში ვითარდება. ტრეილერში ვხედავთ, რომ Peaky Blinders კვლავ შიშის ზარს სცემს მთელ ქვეყანას.

"შენი ბოშა შვილი Peaky Blinders-ს ისე მართავს, თითქოს ისევ 1919 წელი იყოს," — ეუბნება ადა შელბი (სოფი რანდლი) ტომის, რომელიც იძულებულია, დაუბრუნდეს ძველ, ძალადობრივ ცხოვრებას. მას უწევს, რომ ყველას შეახსენოს, თუ ვინ არის სინამდვილეში და ქალაქის გადასარჩენად საკუთარ შვილს დაუპირისპირდეს.

ფოტო: Netflix

სამსახიობო გუნდს ტიმ როთი უერთდება, რომელიც დიუკს ომში გერმანიის მხარდაჭერას სთავაზობს. მერფისა და რანდლის გარდა, ფილმში სტივენ გრემი და ნედ დენეჰიც ბრუნდებიან. პროექტის ახალ სახეებს შორის კი რებეკა ფერგიუსონი და ჯეი ლიკურგო არიან.

ფილმის რეჟისორ ტომ ჰარპერს 2013 წელს დაწყებული სერიალის რამდენიმე ეპიზოდზეც აქვს ნამუშევარი. Peaky Blinders-ის ისტორია 6 სეზონის განმავლობაში გაგრძელდა და 2022 წელს დროებით დასრულდა, თუმცა მას ახალი ფილმი გააცოცხლებს. ასევე დამტკიცდა სერიალის ახალი, 2-სეზონიანი გაგრძელებაც, რომლის აღმასრულებელი პროდიუსერიც თავად კილიან მერფი იქნება. ამ სერიალის სიუჟეტი ქრონოლოგიურად The Immortal Man-ის შემდეგ მიმდინარეობს.

Peaky Blinders: The Immortal Man-ის პრემიერა 20 მარტს, Netflix-ზე შედგება. მანამდე კი, იხილეთ ტრეილერი: