პოპვარსკვლავმა ბრიტნი სპირსმა საკუთარი მუსიკალური კატალოგის უფლებები სრულად გაყიდა. 44 წლის მომღერალმა მუსიკალურ გამომცემლობა Primary Wave-თან ხელშეკრულება 30 დეკემბერს გააფორმა. გარიგების ღირებულება, სავარაუდოდ, $200 მილიონს შეადგენს.

ბრიტნის პირად ცხოვრებასა და პროფესიულ საქმიანობას მრავალი წლის განმავლობაში სასამართლოს მიერ დანიშნული მეურვეობა განსაზღვრავდა. 2024 წლის იანვარში მომღერალმა საჯაროდ განაცხადა, რომ მუსიკალურ ინდუსტრიაში დაბრუნებას აღარ აპირებს. მისი ბოლო მუსიკალური ნამუშევარი — ელტონ ჯონთან ჩაწერილი დუეტი 2022 წელს გამოვიდა.

ფოტო: Michael Kovac/Getty Images

იხილეთ: ბრიტნი სპირსის სასამართლო პროცესი საბოლოოდ დასრულდა — ბრიტნი თავისუფალია

Primary Wave-ის მფლობელობაში ბრიტნისთან ერთად ისეთი ლეგენდების შემოქმედებაა, როგორებიც იყვნენ Notorious B.I.G, პრინსი, უიტნი ჰიუსტონი და ნირვანა. ბოლო პერიოდში საკუთარი მუსიკალური ჩანაწერების უფლებები ისეთმა ვარსკვლავებმა გაყიდეს, როგორებიც არიან ბრიუს სპრინგსტინი, ჯასტინ ბიბერი, ჯასტინ ტიმბერლეიკი და შაკირა. სპრინგსტინმა საკუთარი შემოქმედება 2021 წელს Sony-ს $500 მილიონად მიჰყიდა, ბიბერმა კი 2023 წელს Hipgnosis Songs Capital-თან 200-მილიონიანი კონტრაქტი გააფორმა.

ბრიტნი სპირსი 150 მილიონზე მეტი გაყიდული ჩანაწერითა და 9 სტუდიური ალბომით მსოფლიოში ერთ-ერთი ყველაზე გაყიდვადი არტისტია.

ფოტო: Britney Spears

ნაშრომების გაყიდვის გადაწყვეტილება მომღერლისთვის საკმაოდ მძიმე წლებს მოჰყვა. 2021 წელს სპირსის 13-წლიანი მეურვეობის პროცესი დასრულდა. ამ წლების ფარგლებში მის ფინანსებსა და პირად ცხოვრებას მთლიანად მამამისი აკონტროლებდა. 2023 წელს ბრიტნიმ გამოსცა მემუარები სახელწოდებით The Woman in Me, რომელშიც მეურვეობის ქვეშ ცხოვრების სირთულეები დეტალურად აღწერა.

ასევე იხილეთ: