თბილისის მერიაში ამბობენ, რომ თბილისიმარათონი - 2017 ორგანიზატორებმა გააუქმეს და არა - დედაქალაქის მთავრობამ. ამის შესახებ განცხადება მერიამ მარათონის ორგანიზატორების მიერ გავრცელებული განცხადების საპარსუხოდ გაავრცელეს.

მერიაში ამბობენ, რომ თბილისიმარათონი წლებია მერიის მხარდაჭერითა და პატრონაჟით იმართება. თბილისის მერის, დავით ნარმანიას გადაწყვეტილებით კი, ღონისძიების პოპულარიზაციის მიზნით მარათონის თბილისის ზღვის მიმდებარე ტერიტორიიდან ქალაქის ცენტრალურ ქუჩებში გადმოვიდა.

"გამომდინარე იქიდან, რომ ამჟამად ორბელიანის მოედანსა და მის მიმდებარე არეალში დაწყებულია რეაბილიტაცია და აღნიშნულ ტერიტორიაზე სატრანსპორტო მოძრაობა შეზღუდულია, ღონისძიების ჩატარებისას რუსთაველის გამზირის, აღმაშენებლისა და სხვა ცენტრალური ქუჩების გადაკეტვამ შესაძლოა, გამოიწვიოს სატრანსპორტო კოლაფსი და მოქალაქეების უკმაყოფილება", - ასე განმარტავენ თბილისის მერიაში მარათონის ორგანიზატორებისთვის რბოლის დილის 7 საათზე ან თბილისის ზღვის ტერიტორიაზე გამართვის შეთავაზებას.

მარათონის აღარ გამართვის შესახებ მისმა ორგანიზატორებმა განცხადება გუშინ, 16 ოქტომბერს გაავრცელეს და გადაწყვეტილება თბილისის მერიის განცხადებას დაუკავშირეს.

"მიუხედავად იმისა რომ ღონისძიების გაუქმება მოხდა ჩვენგან დამოუკიდებელი მიზეზების გამო ჰაიდელბერგცემენტი და თბილისიმარათონის საორგანიზაციო ჯგუფი ბოდიშს უხდის ყველა მონაწილეს, სპონსორს, მხარდამჭერს და ბენეფიციარს", - ამბობდნენ მარათონის ორგანიზატორები.

თბილისის მერიის მიერ შეთავაზებული წინადადება მარათონის ორგანიზატორებს შემდეგი გარემოებების გამო მიუღებლად მიაჩნიათ:

  • ღონისძიების დილის 7 საათზე დაწყება - მორბენლები მარათონის დაწყებამდე დაახლოებით 2 საათით ადრე მოდიან ღონისძიებაზე რეგისტრაციის გავლის, სანომრე ნიშნების მიღების და ხელბარგის დასაწყობების მიზნით, დილის 5 საათზე ღონისძიების დაწყება ფიზიკურად შეუძლებელია და არ აკმაყოფილებს არც ერთ საერთაშორისო სტანდარტს;
  • ღონისძიების ლოკაციის შეცვლა - თბილისიმარათონი 2015 წლიდან მარათონებისა და გრძელ დისტანციებზე გარბენთა საერთაშორისო ასოციაციის (AIMS) წევრია და შედეგების დათვლაც მსოფლიოში აპრობირებული, Mika Timing-ის Official Timekeeping and Data Processing ავტომატური სისტემით ხორციელდება. სარბენი მარშრუტი 2016 წელს აიზომა AIMS-ის მიერ. იმის გამო, რომ ღონისძიებამდე სულ რამოდენიმე დღე რჩება შეუძლებელია ლოკალიის შეცვლა, სარბენი ტრასის გაზომვა და ტექნიკის გადაწყობა საჭიროებს სულ მცირე 2-თვიან წინასწარ პროცედურას.