"სამწუხაროდ, მე ახლოდან ვნახე საქართველოს უკუსვლა. ქართულმა ოცნებამ სრულიად შეცვალა სცენარი იმის შესახებ, თუ ვინ არის საქართველოს მეგობარი და ვინ — მტერი", — ამის შესახებ, "მაკკეინის ინსტიტუტის" გლობალური დემოკრატიის პროგრამების უფროსმა დირექტორმა, ლორა თორნტონმა, ჰელსინკის კომისიის პანელურ შეხვედრაზე განაცხადა, სადაც საქართველოს საკითხს განიხილავდნენ. თორნტონის სიტყვის თარგმანს "პუბლიკა" აქვეყნებს.

მისი განმარტებით, თავდაპირველად, როდესაც ნაციონალური მოძრაობა ქართულმა ოცნებამ შეცვალა, ქვეყანა სწრაფი ნაბიჯებით მიიწევდა წინ ევროკავშირსა და NATO-ში გაწევრების გზაზე, თუმცა, მისი თქმით, ეს პერიოდი ხანმოკლე აღმოჩნდა. თორნტონმა ასევე აღნიშნა, რომ "ივანიშვილი არასოდეს ყოფილა დემოკრატიული პრინციპების ან პროცესების ერთგული და, რაც მთავარია, ყოველთვის იყო დაკავშირებული რუსეთთან".

"სამწუხაროდ, მე ახლოდან ვნახე საქართველოს უკუსვლა. საქართველოში 2014 წელს გადავედი, რათა "ეროვნულ-დემოკრატიული ინსტიტუტისთვის" (NDI) მეხელმძღვანელა ზუსტად მას შემდეგ, რაც წინა ხელისუფლებისგან, ერთიანი ნაციონალური მოძრაობისგან, ძალაუფლება წარმატებით და დემოკრატიულად გადაეცა ქართული ოცნების კოალიციას. ეს იყო სხვადასხვა იდეოლოგიური სპექტრის პარტიების კოალიცია, რომელიც ნაციონალური მოძრაობის დასამარცხებლად გაერთიანდა. ეს მაშინ მართლაც ამაღელვებელი იყო, სავსე რეფორმებისა და განახლების დაპირებებით. საქართველო მასპინძლობდა და ლიდერობდა "ღია მმართველობის პარტნიორობას" (OGP). ჩვენ პარლამენტში უამრავ დემოკრატიულ რეფორმაზე ვმუშაობდით და ქვეყანა სწრაფი ნაბიჯებით მიიწევდა წინ ევროკავშირსა და NATO-ში გაწევრების გზაზე.

თუმცა, ეს პერიოდი ხანმოკლე აღმოჩნდა. ბევრს ჰგონია, რომ საქართველოს დემოკრატიული უკუსვლა ძალიან ახალი და სწრაფი პროცესია, მაგრამ მე ვიტყოდი, რომ ნიშნები დიდი ხნის წინ გამოჩნდა. პირველ რიგში, ქართული ოცნების მმართველობას თავიდანვე ჰქონდა საბედისწერო ნაკლი და ეს ნაკლი რუსეთში აღზევებული ოლიგარქი ბიძინა ივანიშვილია. ის არის ადამიანი და საფულე ქართული ოცნების შექმნის უკან, რომელიც ქვეყნის პირველი პრემიერმინისტრიც იყო. ივანიშვილი არასოდეს ყოფილა დემოკრატიული პრინციპების ან პროცესების ერთგული და, რაც მთავარია, ყოველთვის იყო დაკავშირებული რუსეთთან — ქვეყანასთან, რომელმაც ის გაამდიდრა", — თქვა თორნტონმა.

მისივე განმარტებით," უკრაინაში რუსეთის სრულმასშტაბიანი შეჭრა გახდა ის, რის შემდეგაც საქართველომ საბოლოოდ გაწყვიტა კავშირი დასავლეთთან და სრულად ჩაეშვა ავტორიტარიზმში". თორნტონმა ასევე ხაზი გაუსვა იმასაც, რომ საქართველო რუსეთს სანქციებისთვის გვერდის ავლაში ეხმარება. მისივე თქმით, ქართულმა ოცნებამ ჩინეთსა და ირანს მეგობრები უწოდა.

"თითქმის დაუყოვნებლივ დავინახეთ არალიბერალური მიდგომები, რაც ხშირად რუსული ნარატივებით, ანტიდასავლური რიტორიკით და დეზინფორმაციით იწყება უმცირესობების, ქალების, ეთნო-ნაციონალიზმის შესახებ. ეს ყველაფერი სწრაფად გადაიზარდა თავდასხმებში სამოქალაქო საზოგადოებაზე, მედიასა და იმ ინსტიტუტებზე, რომლებიც ხელისუფლების მაკონტროლებლად ითვლებიან.

თუმცა, ვფიქრობ, უკრაინაში რუსეთის სრულმასშტაბიანი შეჭრა გახდა ის, რის შემდეგაც საქართველომ საბოლოოდ გაწყვიტა კავშირი დასავლეთთან და სრულად ჩაეშვა ავტორიტარიზმში. საქართველო სწრაფად დაეხმარა რუსეთს და არა უკრაინას. ისინი დღემდე რუსეთისთვის სანქციების გვერდის ავლის საკვანძო მარშრუტს წარმოადგენენ, რაც მართლაც ირონიულია იმის გათვალისწინებით, რომ უკრაინასა და საქართველოს ბევრი საერთო აქვთ და საქართველოს 20% რუსეთის მიერაა ოკუპირებული. საქართველოს ლიდერები დაუსრულებლად ესხმოდნენ თავს უკრაინასა და ზელენსკის, ხოლო რუსეთთან დაკავშირებით ჩუმად იყვნენ. შემდეგ კი თავდასხმები ევროპისა და აშშ-ისკენ მიმართეს, წარმოგვაჩინეს მტრულ აქტორებად და დაგვადანაშაულეს "გლობალური ომის პარტიის" ნაწილად ყოფნაში, რომელსაც საქართველოს მეორე ფრონტში ჩათრევა სურს. ევროპას კი იმაში სდებდნენ ბრალს, რასაც მათ "ლიბერალური ფაშიზმი" უწოდეს.

პარალელურად, ქართულმა ოცნებამ ჩინეთსა და ირანს ღიად უწოდა მეგობრები, მოკავშირეები და პარტნიორები. მაგალითად, არსებობს ფოტო, სადაც პრემიერმინისტრი ირაკლი კობახიძე თეირანში "ჰამასის" წარმომადგენლების გვერდით დგას. ასე რომ, ქართულმა ოცნებამ სრულიად შეცვალა სცენარი იმის შესახებ, თუ ვინ არის საქართველოს მეგობარი და ვინ — მტერი", — განაცხადა თორნტონმა.