საქართველოში ადამიანის უფლებების მდგომარეობის გაუარესების შესახებ ბრიფინგი ჰელსინკის კომისიაში დღეს გაიმართება. მას ასეთი სახელწოდება აქვს: "ქართული ოცნების მიერ განსხვავებული აზრის წინააღმდეგ მკაცრი ზომების მიღება".

ჰელსინკის კომისიის მიერ გავრცელებულ განცხადებაშია ნათქვამია, რომ "2024 წლის ოქტომბრიდან, საქართველოს მმართველმა პარტიამ, "ქართულმა ოცნებამ" ქვეყანა, დამოუკიდებლობის მოპოვების შემდეგ, ადამიანის უფლებების მიმართულებით, ყველაზე მძიმე კრიზისში ჩააგდო. მათ მიიღეს 20-ზე მეტი ახალი კანონი, რომლებიც აძლიერებენ სახელმწიფო ძალაუფლებას განსხვავებული აზრის ჩასახშობად და სასამართლოს დამოუკიდებლობას ართმევენ.

რეპრესიებმა სამოქალაქო საზოგადოება, ჟურნალისტები და პოლიტიკური ოპოზიცია მოიცვა. ხელისუფლებამ გაყინა მომიტინგეებისთვის იურიდიული დახმარების გამწევი ორგანიზაციების საბანკო ანგარიშები, დააკავა ჟურნალისტები და ოპოზიციის წარმომადგენლები სასამართლოში ფიქტიური პროცესებისთვის დაიბარა, რის გამოც ისინი მათივე ხელისუფლების აღიარებაზე უარის თქმის გამო დააპატიმრა. მშვიდობიანი პროტესტი ამჟამად მაღალ ჯარიმებსა და ხანგრძლივ პატიმრობას იწვევს.

ეს ბრიფინგი განიხილავს ადამიანის უფლებების მდგომარეობის გაუარესებას, ქართული ოცნების მიერ განსხვავებული აზრის მქონე პირების დასჯისა და დემორალიზაციის ტაქტიკას და საქართველოს სამომავლო გზებს", — წერია ჰელსინკის კომისიის ვებგვერდზე გავრცელებულ ინფორმაციაში.

ბრიფინგზე სიტყვით გამომვლენ: McLarty Associates-ის უფროსი მმართველი დირექტორი დოქტორი კლერ კაიზერი, მაკკეინის ინსტიტუტის უფროსი დირექტორი ლორა თორნტონი, ჯორჯ მეისონის უნივერსიტეტის მკვლევარი ოლესია ვართანიანი.

ჰელსინკის კომისიაში საქართველოში არსებული ვითარების შესახებ ბრიფინგი 28 იანვარს იყო დაგეგმილი, თუმცა უამინდობის გამო გადაიდო.