საქართველოს ახალგაზრდა იურისტთა ასოციაციამ ეუთოს ადამიანური განზომილების მექანიზმის ფარგლებში საქართველოში ადამიანის უფლებებისა და სამართლის უზენაესობის მდგომარეობის თაობაზე ინფორმაცია წარადგინა.

როგორც საია წერს, ეუთოს მოსკოვის მექანიზმის ფარგლებში საიას მიერ წარდგენილი კომუნიკაციები საქართველოში 2024 წლის გაზაფხულიდან დღემდე განვითარებულ მოვლენებთან დაკავშირებულ ინფორმაციას მოიცავს, მათ შორის: შეკრების, გაერთიანებისა და გამოხატვის თავისუფლებების, წამების აკრძალვის, სისხლის სამართლის მართლმსაჯულების, სასამართლოს სისტემის გამოწვევებისა და რეპრესიული კანონშემოქმედების შესახებ.

ჯამში საიამ 7 თემატური ანგარიში და შესაბამისი წყაროები წარადგინა.

შეგახსენებთ, დიდმა ბრიტანეთმა და კიდევ 23-მა ქვეყანამ, საქართველოში ადამიანის უფლებების მდგომარეობის გაუარესებასთან დაკავშირებით ექსპერტთა მისიის შესაქმნელად, ეუთოს "მოსკოვის მექანიზმი" გაააქტიურა. ამის შესახებ ინფორმაცია დიდი ბრიტანეთის მთავრობის ვებგვერდზევე გამოქვეყნდა.

განცხადებაში წერია, რომ ეუთოს წევრი 24 ქვეყანა ქმნის "ფაქტების დამდგენი მისიას, რათა შეაფასონ საქართველოს მიერ ეუთოს წინაშე არსებული ვალდებულებების შესრულება, განსაკუთრებული ყურადღება 2024 წლის გაზაფხულიდან განვითარებულ მოვლენებზე გაამახვილებენ". ამას გარდა წერილის ავტორები მოუწოდებენ საქართველოს, ითანამშრომლოს მისიასთან და ხელი შეუწყოს მის მუშაობას.