11 თებერვალს საქართველოს უნივერსიტეტი კრიპტო დღეს მასპინძლობს — თემატურ კონფერენციას, რომელიც მიზნად ისახავს საქართველოში კრიპტოინდუსტრიის პროფესიულ განხილვასა და განვითარებას. ღონისძიება ხორციელდება საკონსულტაციო კომპანია CryptoEthica-ს დამფუძნებლისა და საქართველოს უნივერსიტეტის ბლოკჩეინისა და დეცენტრალიზებული საინფორმაციო სისტემების სამაგისტრო პროგრამის ხელმძღვანელის, ვახტანგ ჩხენკელის ინიციატივით.

კონფერენციის მთავარი იდეა პროფესიონალური დიალოგის შექმნაა — იმ ადამიანებს შორის, რომლებიც დღეს განსაზღვრავენ კრიპტოინდუსტრიის წესებს. ერთ სივრცეში თავს მოიყრიან სფეროს ექსპერტები, პოლიტიკის შემმუშავებლები და აკადემიური წრეების წარმომადგენლები, რათა განიხილონ, როგორც გლობალური ტენდენციები, ისე ქართული ბაზრის რეალობა და გამოწვევები.

ვახტანგ ჩხენკელის თქმით, ქართულ კრიპტო ბაზარზე ერთ-ერთ ყველაზე დიდ ბარიერს კვალიფიციური კადრების დეფიციტი წარმოადგენს: “სწორედ ამიტომ კრიპტო დღე უფრო მეტია, ვიდრე უბრალოდ კონფერენცია, ის არის დამაკავშირებელი რგოლი სტუდენტებსა და რეალურ ბიზნესს შორის. მონაწილეები ხედავენ, რას ითხოვს ბაზარი დღეს, სად არის ცოდნის ნაკლებობა და როგორ შეიძლება ამ ვაკუუმის შევსება თანამედროვე განათლებისა და პრაქტიკული გამოცდილების გზით”.

განსაკუთრებული ადგილი კონფერენციაზე დაეთმობა ბლოკჩეინისა და დეცენტრალიზებული საინფორმაციო სისტემების სამაგისტრო პროგრამის ხედვას, რომელიც ქვეყანაში პირველი და უნიკალურია. პროგრამის მთავარი უპირატესობა მისი მულტიდისციპლინური ხასიათია. აქ სტუდენტები არ სწავლობენ მხოლოდ კოდირებას. ისინი ეცნობიან ტექნოლოგიის, ფინანსების, კიბერუსაფრთხოებისა და სამართლის გადაკვეთის წერტილებს, რაც თანამედროვე კრიპტოინდუსტრიისთვის კრიტიკულად მნიშვნელოვანია. პროგრამაში ჩართული ლექტორები მოქმედი პრაქტიკოსები არიან, როგორც საქართველოში, ისე მის ფარგლებს გარეთ, რაც სტუდენტებს საშუალებას აძლევს მიიღონ რეალურ ბაზარზე მორგებული, აქტუალური ცოდნა. სწავლება სრულდება სამაგისტრო ნაშრომით, რომელიც რეალური პროდუქტის შექმნას გულისხმობს, ხოლო უნივერსიტეტი და პარტნიორი ორგანიზაციები სტუდენტებს ეხმარებიან, რომ იდეა პროტოტიპად ან სრულფასოვან ბიზნესპროექტად ჩამოყალიბდეს.

კონფერენციის განმავლობაში განხილული იქნება კრიპტოინდუსტრიის განვითარების მთავარ მიმართულებები — გლობალური და ქართული ბაზრის ევოლუცია, ფინანსური ინსტრუმენტების ტოკენიზაციის პერსპექტივები, ასევე ის საკანონმდებლო ცვლილებები, რომლებიც დღეს კრიპტო სექტორისთვის გადამწყვეტ როლს ასრულებს. განსაკუთრებული ყურადღება დაეთმობა ახალ რეგულაციებს, რომლებიც მკაცრ მოთხოვნებს აწესებს მომხმარებელთა უფლებების დაცვის, კიბერუსაფრთხოებისა და კაპიტალის მართვის მიმართულებით. ამ კონტექსტში პრუდენციული ვალდებულებების განხილვა განსაკუთრებით მნიშვნელოვანია, რადგან ისინი ყველა ბაზრის მონაწილისთვის სავალდებულო ჩარჩოს ქმნის.

კონფერენციის დღის წესრიგში ასევე მნიშვნელოვანი ადგილი უკავია ევროკავშირის MiCA რეგულაციას და მის გავლენას ქართულ კრიპტო ეკოსისტემაზე, ფისკალურ პოლიტიკას და ვირტუალური აქტივების დაბეგვრის სპეციფიკას საქართველოში. ეს თემები განსაკუთრებით საინტერესო იქნება იურისტებისთვის, შესაბამისობის სპეციალისტებისთვის, ბუღალტრებისა და ფინანსისტებისთვის, ხოლო ფინანსური სექტორის წარმომადგენლებისთვის - ტოკენიზაციის მოდელები, რომლებიც საბანკო და საფინანსო ინდუსტრიის მომავალს განსაზღვრავს.

ვახტანგ ჩხენკელის შეფასებით, კრიპტო დღე მხოლოდ ერთჯერადი ღონისძიება არ არის; ის უფრო გრძელვადიანი სტრატეგიის დასაწყისს წარმოადგენს, რომლის მიზანია მსგავსი შეხვედრების რეგულარულ პლატფორმად ჩამოყალიბება. ეს იქნება სივრცე, სადაც სტუდენტები და ინდუსტრიის წარმომადგენლები მუდმივად გაეცნობიან ახალ ტენდენციებს, გამოწვევებსა და მათი გადაჭრის პრაქტიკულ გზებს — სპეციალური დისკუსიებისა და ვორქშოფების საშუალებით.

ბლოკჩეინის სამაგისტრო პროგრამის შესახებ დამატებითი ინფორმაციის მიღება შესაძლებელია მითითებულ ბმულზე.