კომუნიკაციების კომისიის თავმჯდომარედ 3 წლით ოცნების ყოფილი დეპუტატი გოგა გულორდავა აირჩიეს. კომუნიკაციების კომისიის მოქმედი თავმჯდომარეს, კახა ბექაურს უფლებამოსილება ამოეწურა.

2025 წლის 9 დეკემბერს, გოლურდავა 6 წლით კომისიის წევრად აირჩიეს. 2016-2020 წლებში ის ოცნების მაჟორიტარი დეპუტატი იყო. ComCom-ის წევრობაზე კენჭს იყრიდა ვლადიმერ ტატიშვილი — საზოგადოებრივი მაუწყებლის აჭარის ტელევიზიის ყოფილ დირექტორი და ილია მიქელაიშვილი — შპს "მედიაჰაბი სეილსჰაუსის" და "პირველის" დამფუძნებელი.

"გოგა გულორდავას 26 წლიანი სამუშაო გამოცდილება აქვს. კომუნიკაციების კომისიამდე, იგი 2 წლის განმავლობაში ტელეკომპანია "ტელეიმედში" ფინანსური მონიტორისა და აუდიტის პოზიციას იკავებდა. 2020 წლიდან 2025 წლამდე კი, საქართველოს სახელმწიფო ელექტროსისტემაში გენერალური დირექტორის მრჩეველი, შემდგომ კი, ამავე უწყებაში, შიდა აუდიტის დირექტორი იყო. 2016-2020 წლებში გოგა გულორდავა საქართველოს პარლამენტის წევრი, ხოლო 2013-2016 წლებში წალენჯიხის მუნიციპალიტეტის გამგებელი იყო.

პროფესიით გოგა გულორდავა იურისტია, მან 1995-2000 წლებში ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი დაამთავრა. სხვადასხვა დროს გოგა გულორდავას გავლილი აქვს საბაჟო და საგადასახადო კანონმდებლობის, სახელმწიფო შესყიდვების, ფინანსური აღრიცხვის, აუდიტორებისა და პროკურორების სასწავლო კურსები საქართველოსა და სხვა ქვეყნებში, მათ შორის, ამერიკის შეერთებულ შტატებსა და გერმანიაში. გარდა ამისა, ჩაბარებული აქვს პროკურატურის მუშაკთა საკვალიფიკაციო გამოცდა.

შეგახსენებთ, რომ 2025 წლის დეკემბერში გოგა გულორდავა საქართველოს პარლამენტმა ComCom-ის წევრად 77 ხმით, ერთხმად დაამტკიცა", — წერია comcom-ის მიერ გავრცელებულ ინფორმციაში.