ზარზმის მამათა მონასტრის ყოფილ წინამძღვარს, არქიმანდრიტ ნიკოლოზ გეწაძეს, რომელსაც გოგოები სექსუალურ შევიწროებაში ადანაშაულებდნენ, სავარაუდოდ, მღვდელმოქმედება აღუდგინეს — ამის შესახებ ინფორმაციას სამხრეთის კარიბჭე ავრცელებს.

გამოცემა წერს, რომ ერთ–ერთმა მოქალაქემ სასულიერო პირის მხარდამჭერ ფეისბუკ-ჯგუფში პოსტი გამოაქვეყნა, სადაც აღნიშნულია, რომ ყოფილ წინამძღვარმა ნიკოლოზმა ნათლისღების დღესასწაულთან დაკავშირებით, წირვა–ლოცვა სოფელ მოხის ტაძარში აღავლინა.

"2026 წლის 19 იანვარს ადიგენის რაიონის სოფელ მოხეში, ანდრია პირველწოდებულის სახელობის მოხის დედათა მონასტერში მისივე აშენებული ტაძრის ამბიონიდან ნათლისღების დღესასწაული მოგვილოცა და წირვა-ლოცვა აღავლინა ადიგენის რაიონის ერთ-ერთმა ყველაზე დიდმა გულშემატკივარმა, ეკლესია მონასტრების აღმშენებელმა და დედა ეკლესიის ღირსეულმა წარმომადგენელმა არქიმანდრიტმა მამა ნიკოლოზმა. შემდეგ იყო წყალკურთხევა მდინარე ქვაბლიანში, ზარზმის და ქვაბიჯვრის მამათა მონასტრების მამებთან და ადგილობრივ მოსახლეობასთან ერთად. განსაკუთრებით გილოცავთ ადიგენელებო, მესხებო", — წერს მოქალაქე და წირვის ამსახველ ფოტო–ვიდეოს აქვეყნებს.

სამხრეთის კარიბჭის ცნობით, ისინი არქიმანდრიტ ნიკოლოზს დაუკავშირდნენ, თუმცა მან კითხვის დასმის შემდეგ ტელეფონი გათიშა და მოკლე ტექსტურ შეტყობინებებსაც არ უპასუხა. ისინი ასევე დაუკავშირდნენ საპატრიარქოს საზოგადოებასთან ურთიერთობის სამსახურის უფროსს, ანდრია ჯაღმაიძეს, რომელმაც გამოცემას უთხრა, რომ ინფორმაციას არ ფლობდა და ადგილობრივ ეპარქიაში გადაამისამართა.

"არ ვიცი. მე არ მაქვს ინფორმაცია. გადაწყვეტილებას იღებს ეპარქიის ხელმძღვანელი, ვერ დაგეხმარებით, გაარკვიეთ ეპარქიაში", — უთხრა ჯაღმაიძემ გამოცემას.

ახალციხეში მდებარე ერთ–ერთ ტაძარში კი მათ უთხრეს, რომ სასულიერო პირთან დაკავშირებას მხოლოდ კვირას, წირვის შემდეგ შეძლებდნენ.

როგორც სამხრეთის კარიბჭე წერს, ზარზმის მამათა მონასტრის წინამძღვარს, არქიმანდრიტ ნიკოლოზ გეწაძეს, სავარაუდოდ 5 ახალგაზრდა ქალზე მეტი, სექსუალურ შევიწროებაში 2024 წლის დეკემბერში ადანაშაულებდა.

სამხრეთის კარიბჭე საევე იუწყება, რომ ამბის გახმაურებიდან მალევე, სასულიერო პირს მეუფე თეოდორემ მღვდელმოქმედება შეუჩერა, თუმცა რამდენი ხნით ამის შესახებ ინფრომაცია არ გავრცელებულა. მას შემდეგ ერთი წელია გასული.

2025 წლის 6 თებერვალს გავრცელდა ინფრომაცია იმის შესახებაც, რომ არქიმანდრიტი ხალციხის მერიის ააიპ-ის დირექტორად დაინიშნა.