საფრანგეთმა, 14 იანვარს, ლუვრის მუზეუმის შესასვლელი ბილეთების ფასი 45%-ით გაზარდა იმ პირებისთვის, რომლებსაც არ აქვთ ევროკავშირის მოქალაქეობა.

დღეიდან, ლუვრში შესასვლელად ევროკავშირის არაწევრი ქვეყნების მოქალაქეებს — გარდა ნორვეგიის, ისლანდიის და ლიხტენშტაინისა — €22 ნაცვლად, €32 ($37.50) გადახდა მოუწევთ.

ფოტო: AP

გარდა ლუვრისა, სახელმწიფოს საკუთრებაში არსებულ კულტურულად მნიშვნელოვან სხვა ადგილებში, მათ შორის, ვერსალის სასახლეში, პარიზის ოპერის თეატრსა და შამბორის მუზემში, შესვლის ფასი 45%-ით უკვე გაიზარდა.

"ორმაგი ფასების" დებატი ევროპაში

ეს ნაბიჯი ევროპაში ე.წ. "ორმაგი ფასების" დანერგვის ყველაზე მკაცრი შემთხვევაა, რაც იმას ნიშნავს, რომ ვიზიტორებს მათი წარმოშობის მიხედვით განსხვავებულ ტარიფებს უწესებენ.

ეს პრაქტიკა გავრცელებულია ბევრ სხვა განვითარებად ქვეყანაში, თუმცა აქამდე ეს იშვიათობა იყო ევროპის ქვეყნებისთვის. აღსანიშნავია, რომ ამ ნაბიჯმა საფრანგეთში კრიტიკა გამოიწვია დისკრიმინაციული ხასიათის გამო, ვინაიდან ის ართულებს დაბალი შემოსავლის მქონე უცხოელი ვიზიტორებისთვის მონა ლიზასა და სხვა მნიშვნელოვანი ხელოვნების ნიმუშების მონახულებას.

ფოტო: Reuters

ფრანგულმა საინფორმაციო მედიამ, ოთხშაბათს, პარიზის მუზეუმის რამდენიმე ვიზიტორთან ისაუბრა, რომელთაგან ზოგიერთმა უკმაყოფილება გამოთქვა, ზოგმა კი ფასის უეცარი ზრდა კარგ პრაქტიკად მიიჩნია.

ფოტო: AFP

საფრანგეთის მთავრობამ ფასების უეცარ ცვლილებაზე ისაუბრა და განაცხადა, რომ ეს ხელს შეუწყობს მუზეუმისთვის ყოველწლიურად დამატებით 20-30 მილიონი ევროს შეგროვებას. ეს თანხა მოხმარდება რემონტს, მათ შორის, გასულ წელს გაძარცული ლუვრის დანაკარგებს.

მუზეუმის მონაცემების მიხედვით, 2024 წელს ლუვრს 8.7 მილიონი ვიზიტორი ეწვია, მათგან 23% ფრანგი იყო, ხოლო 13% — პარიზისა და მისი შემოგარენის მცხოვრებლები. ამასთანავე, ფრანგი ვიზიტორების თითქმის ორ მესამედს უფასოდ შესვლა შეეძლო.

მსოფლიოს ნებისმიერი კუთხიდან ჩამოსული არასრულწლოვანებისა და 26 წლამდე ასაკის ნებისმიერი საფრანგეთის მოქალაქისთვის ლუვრში შესვლა უფასოა. 20-მდე ადამიანისგან შემდგარი ჯგუფები, რომლებიც ჯგუფურად ჯავშნიან ტურებს, იღებენ ფასდაკლებას.

იმ შემთხვევაში, თუ 18 წლამდე პირი არ ხართ ან არ გაქვთ დაგეგმილი ჯგუფური ტური, €22 ნაცვლად, დღეიდან, ლუვრში შესასვლელად €32 (თითქმის 100₾) გადახდა მოგიწევთ.