Spotify ჰოლივუდში, Sycamore-ის მედია უბანში, ახალ პოდკასტ-სტუდიას ხსნის, ეს მისი მეორე ლოკაციაა ლოს-ანჯელესში და სპეციალურად ვიდეოკონტენტზეა ორიენტირებული, რადგან ფორმატი სწრაფად ვითარდება.

დაახლოებით 1 000 კვ. მეტრი ფართობის სივრცე მოიცავს ხუთ სტუდიას და დაკომპლექტებულია Spotify-ის თანამშრომლებით, რომლებიც უშუალოდ შემქმნელებს დაეხმარებიან კონტენტის წარმოებაში.

ახალი სტუდია Spotify-ის პოდკასტინგში ჩადებული $10 მილიარდიანი ინვესტიციის ნაწილია. ამავე სტრატეგიის ფარგლებში, Spotify-ის ერთ-ერთი ბრენდის, The Ringer-ის ვიდეოპოდკასტები 2026 წლიდან Netflix-ზე დაიწყებს სტრიმინგს.

ახალი სივრცე მხოლოდ მოწვევით იქნება ხელმისაწვდომი და ძირითადად ვიდეოპოდკასტებზე იქნება ორიენტირებული. Spotify-ის 2021 წელს გახსნილი Arts District-ის სტუდიები მუშაობას გააგრძელებს და აუდიოკონტენტზე კონცენტრირდება, ხოლო ჰოლივუდის ლოკაცია სრულად ვიდეოზე ორიენტირებულ გარემოს შესთავაზებს შემქმნელებს.

სტუდია მოიცავს ხუთ განსხვავებულ სივრცეს, რომლებიც სხვადასხვა ფორმატს მოერგება, ინტერვიუს ჩაწერებიდან დაწყებული, დიდი ჯგუფებისთვის განკუთვნილი მასშტაბური გადაღებებით დასრულებული. ლოს-ანჯელესში არსებული სხვა გაქირავებადი სტუდიებისგან განსხვავებით, ეს სივრცე დაკომპლექტებულია Spotify-ის შიდა გუნდით, რაც პლატფორმას საშუალებას აძლევს, უშუალოდ ჩაერთოს შოუების წარმოების პროცესში.

Spotify-ის პოდკასტებისა და ვიდეოს ვიცე-პრეზიდენტის, რომან ვაზენმიულერის თქმით, კომპანიისთვის აუცილებელი გახდა არა მხოლოდ ინფრასტრუქტურის გაფართოება, არამედ ისეთი გარემოს შექმნა, რომელიც პოდკასტინგის ახალ, ვიზუალურ ეპოქას მოერგება.

Spotify-ის შეფასებით, ბოლო ხუთი წლის განმავლობაში კომპანიამ პოდკასტის ინდუსტრიაში $10 მილიარდზე მეტი ჩადო. დღეს პლატფორმაზე ხელმისაწვდომია თითქმის 7 მილიონამდე პოდკასტი, მათ შორის ერთ-ერთი ყველაზე პოპულარული შოუა Amy Poehler-ის Good Hang, ასევე The Joe Rogan Experience. ხოლო ვიდეოფორმატზე გადასვლა სულ უფრო მკაფიოდ აჩვენებს, რომ Spotify პოდკასტებს არა როგორც დამატებით ფუნქციას, არამედ როგორც გართობის ინდუსტრიის ერთ-ერთ მთავარ მიმართულებას განიხილავს.

"პოდკასტები დღეს უკვე მეინსტრიმ კულტურის ნაწილია", — ამბობს ვაზენმიულერი — "ეს მედია აღარ არის ნიშური, ის წამყვან პლატფორმებზეა წარმოდგენილი და ერთგვარად, გასართობი ინდუსტრიის მომავალია".

Spotify 2006 წელს შვედეთში დაფუძნებული კომპანიაა. დღეს ის მსოფლიოში ყველაზე პოპულარული აუდიოსტრიმინგის სააბონენტო სერვისია: 713 მილიონზე მეტი მომხმარებლით, ხელმისაწვდომია 180-ზე მეტ ქვეყანაში, 100 მილიონზე მეტი სიმღერით და 350 000 აუდიოწიგნით.