აჭარის საავტომობილო გზების დეპარტამენტის განცხადებით, ხულოს, შუახევის, ქედას, ხელვაჩაურის და ქობულეთის მუნიციპალიტეტებში თოვლის საფარისგან საავტომობილო გზების გაწმენდა ინტენსიურ რეჟიმში მიმდინარეობს. მაღალი ზონის სოფლებში თოვლის საფარი 1 მეტრს აღწევს, ხოლო დაბაში 50 სანტიმეტრია. დეპარტამენტის რჩევაა მაღალმთიან მუნიციპალიტეტებში მაღალი გამავლობის სატრანსპორტო საშუალების გადაადგილება მოცურების საწინააღმდეგო ჯაჭვების გამოყენებით მოხდეს.

"სამუშაოებში ჩართულია აჭარის საავტომობილო გზების დეპარტამენტის ტექნიკა და ადამიანური რესურსი.

ამ დროისთვის თოვლის საფარისგან იწმინდება ადმინისტრაციულ ცენტრებთან მისასვლელი საავტომობილო გზები.

მაღალმთიან მუნიციპალიტეტებში რეკომენდებულია მაღალი გამავლობის სატრანსპორტო საშუალების გადაადგილება მოცურების საწინააღმდეგო ჯაჭვების გამოყენებით," — წერია გავრცელებულ განცხადებაში.

ინტერპრესნიუსის ინფორმაციით, ქობულეთში ძლიერმა ქარმა საცხოვრებელ სახლს სახურავი გადახადა — შემთხვევის შედეგად არავინ დაშავებულა.