სახალხო დამცველმა, ლევან იოსელიანმა განაცხადა, რომ პატიმრობაში მყოფი პროევროპული აქციების მონაწილე ზვიად ცეცხლაძის, ვეფხია კასრაძის და ვასილ კაძელაშვილის საქმეზე სასამართლოს მეგობრის მოსაზრებით მიმართავს.

სახალხო დამცველი სასამართლოს მიმართავს მეგობრის მოსაზრებით (amicus curiae), რაც ნიშნავს, რომ ის არ არის საქმეში პირდაპირი მხარე, მაგრამ წარმოადგენს საკუთარ ექსპერტულ შეფასებას ადამიანის უფლებების დაცვის საკითხებზე. მისი როლია დაეხმაროს სასამართლოს სამართლიანი გადაწყვეტილების მიღებაში, მიუთითოს სამართლებრივი და პრაქტიკული გავლენები, თუმცა თავად მხარედ არ იღებს მონაწილეობას.

იოსელიანის განცხადებით, პროევროპულ აქციებში მონაწილეობისთვის ნარკოდანაშაულის ბრალდებით დაკავებული 3 პირის სასამართლო პროცესებს ომბუდსმენი აკვირდებოდა და მათ აღმოაჩინეს, რომ საქმეში ნეიტრალური მტკიცებულებები არ არსებობდა.

"8 მსჯავრდადებულის საქმე შევისწავლეთ. აქედან 3 მსჯავრდადებულის შემთხვევაში აღმოვაჩინეთ პროცესუალური დარღვევები, რაზეც მივმართავთ სასამართლოს. თუ რამეში არის პროცესუალური არსებითი დარღვევები ამ შემთხვევაში მივუთითებთ სასამართლოს, რომ ყურადღება გაამახვილოს ამ პროცესულ დარღვევებზე, როგორიც მაგალითად იყო, როდესაც ახობაძის და სხვა კიდევ ორი პირის შემთხვევაში არ იყო საქმეზე დამაგრებული ნეიტრალური მტკიცებულებები, რაც გულისხმობს იმას, რომ ჩხრეკა-ამოღება ჩატარდა პროცედურული დარღვევებით. ეს გახდა საფუძველი ამ ადამიანების სასამართლო დარბაზიდან განთავისუფლების. ანალოგიურად, სხვა საკითხებზე როდესაც ვხედავთ ასეთ დარღვევებს და ვნახეთ ასეთი დარღვევები ამ ადამიანების საქმეებში, ამიტომ მივიღე გადაწყვეტილება რომ მივმართო სასამართლოს მეგობრის სტატუსით და მივუთითო ამ გარემოებებზე," — განაცხადა იოსელიანმა.

შეგახსენებთ, პროევროპულ აქციებში მონაწილეობისთვის დაკავებულ ზვიად ცეცხლაძეს, ვეფხია კასრაძეს და ვასილ კაძელაშვილს სასამართლომ 2,5 წლით თავისუფლების აღკვეთა მიუსაჯა — მათ ჯგუფური ძალადობის ორგანიზება ედებოდათ ბრალად. მათ და 5 პირის პირველი ინსტანციით გამოტანილ გადაწყვეტილებას სააპელაციო სასამართლო განიხილავს.