გატაცებული აზერბაიჯანელი ჟურნალისტის აფგან მუხტარლის ცოლმა, ლეილა მუსტაფაევამ და მცირეწლოვანმა შვილმა გუშინ საქართველო დატოვეს. ამის შესახებ მუხტარლის ადვიკატმა, არჩილ ჩოფიკაშვილმა ფეისბუკაზე დაწერა:

"მე-3 უსაფრთხო ქვეყნის შემოთავაზება და მოძიება მთელი პერიოდის განმავლობაში ინტენსიურად განიხილებოდა. ამჟამად, გატაცებული ჟურნალისტის ოჯახი გერმანიაშია. გამოძიების მიმართ არსებული პრეტენზიებისა და არსებული საფრთხეების ფონზე, მაღალი ალბათობით შესაძლოა ლეილა მუსტაფაევა (მეუღლის მსგავსად) გამხდარიყო გატაცების და აზერბაიჯანში პოლიტიკური პატიმრობის მსხვერპლი".

On.ge ესაუბრა საზღვარგარეთ მყოფ ლეილა მუსტაფაევას, რომელმაც განგვიცხადა, რომ მას ჯერ საბოლოოდ არ აქვს გადაწყვეტილი, დარჩება თუ არა ევროპაში.

19 სექტემბერს, აფგან მუხტარლის ცოლმა და აზერბაიჯანელმა პოლიტიკურმა აქტივისტმა დაშგინ აღალარლიმ მათზე შესაძლო თვალთვალის კადრები გამოაქვეყნა. მუხტარლისა და მისი ოჯახის ინტერესების დამცველი, არჩილ ჩოფიკაშვილმა განაცხადა, რომ მუსტაფაევასა და აღალარლის მიმართ, შესაძლოა, ახალი დანაშაული მზადდებოდეს.

მეხუთე თვეა, თბილისიდან გატაცებული აზერბაიჯანელი გამომძიებელი ჟურნალისტი, აფგან მუხტარლი ბაქოს ციხეში იმყოფება და წინასწარი პატიმრობა აქვს მისჯილი. აზერბაიჯანის ხელისუფლება ჟურნალისტს სახელმწიფო საზღვრის უკანონოდ გადაკვეთას და კონტრაბანდას ედავება. თავად მუხტარლი კი ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს.

საქართველოში შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს. აფგან მუხტარლის და ლეილა მუსტაფაევას საქმეს განიხილავს ევროპის ადამიანის უფლებათა დაცვის საერთაშორისო სასამართლო საქმეს მინიჭებული აქვს პრიორიტეტი.