ოცნების პარლამენტის იურიდიული კომიტეტის თავმჯდომარის, არჩილ გორდულაძის განცხადებით, 1-ელი იანვრიდან მართვის მოწმობა აღუდგებათ პირებს, რომლებსაც ეს უფლება ალკოჰოლური/ნარკოტიკული ნივთიერების გამოყენებისთვის, შემთხვევის ადგილის მიტოვების ან (მართვის მოწმობის) ქულები გაუნულდათ გამო ჩამოერთვათ. ასევე მათ მართვის მოწმობაზე 100 ქულის მიენიჭებათ. იურიდიულ საკითხთა კომიტეტმა აღნიშნული ცვლილება დღეს საბოლოოდ დაამტკიცა

"ის პირი, რომელსაც 2025 წლის 10 დეკემბრამდე ჩადენილი აქვს საქართველოს სისხლის სამართლის კოდექსის 260-ე მუხლის პირველი ნაწილით ან/და 273-ე მუხლით განსაზღვრული სისხლის სამართლის დანაშაული, ერთჯერადად აღუდგეს "ნარკოტიკული დანაშაულის წინააღმდეგ ბრძოლის შესახებ" საქართველოს კანონში მე-3 მუხლის პირველი პუნქტის "ა" ქვეპუნქტით გათვალისწინებული უფლება. დასახელებული მუხლი განსაზღვრავს უფლების აღდგენისთვის სასამართლოსთვის მიმართვის შესაძლებლობას, ამასთან სასამართლო უფლებამოსილი იქნება აღნიშნული საკითხი განიხილოს ზეპირი მოსმენის გარეშე," — ვკითხულობთ კანონპროექტში.

მართვის მოწმობების დაბრუნებასთან ერთად ოცნების პარლამენტი კანონს ამკაცრებს — ამის შემდეგ, თუ პირს აღნიშნული მიზეზების გამო მეორედ ჩამოერთვა მართვის მოწმობა, ის ვეღარ შეძლებს მის დაბრუნებას ფულადი ჯარიმის გადახდით ან მართვის მოწმობის გამოცდის თავიდან ჩაბარებით.

გორდულაძემ დააკონკრეტა, რომ ალკოჰოლური თრობის გამო ჩამორთმეული მართვის მოწმობები 1-ელი თებერვლიდან დაუბრუნდებათ. მცირე ნარკოტიკული ნივთიერების შენახვა/გამოყენების გამო ჩამორთმეული პირები ნარკოტესტის ჩაბარების შემდეგ 1-ელი იანვრიდან შეძლებენ მართვის უფლების დაბრუნებას.

"თუ ისინი კვალავ ჩაიდენენ იგივე დარღვევას, მათთვის კანონი იქნება მკაცრად განსაზღვრული. ამავდროულად, საკანონმდებლო ინიციატივის მიხედვით, აღარ იქნება შესაძლებლობა, რომ თუ პირს ჩამორთმეული აქვს მართვის მოწმობა ალკოჰოლური სიმთვრალის გამო და გავა ჩამორთმევის ვადის ნახევარი, მიმართოს საპატრულო პოლიციის სამსახურს და გადაიხადოს კონკრეტულო თანხა, ან მაგალითად, ჩააბაროს მართვის მოწმობის გამოცდები და აიღოს მართვის მოწმობა. ეს ჩანაწერები უქმდება. შესაბამისად, 2 ნაწილად შეიძლება დავყოთ წარმოდგენილი ინიციატივები. ერთი მხრივ, თუ პირს ალკოჰოლური სიმთვრალის გამო, შემთხვევის ადგილის მიტოვების გამო, ასევე, ნარკოტიკული საშუალების მცირე ოდენობით შეძენისთვის, ან მოხმარებისთვის ჩამორთმეული აქვს მართვის მოწმობა, ასევე თუ ქულები გაუნულდათ, მათ 1-ელი იანვრიდან, აღუდგებათ მართვის მოწმობები, ალკოჰოლურის შემთხვევაში, 1-ელი თებერვლიდან. ხოლო სხვა პირებს, მაგალითად, ნარკოტიკების მოხმარების შემთხვევაში თუ ისინი დინამიკურ დასკვნას წარადგენენ და დადასტურდება, რომ ისინი აღარ არიან მომხმარებლები იმ მომენტიდან აღუდგებათ მართვის მოწმობა და შეეძლებათ, თავიანთი სატრანსპორტო საშუალებით სარგებლობა," — განაცხადა გორდულაძემ.

მართვის მოწმობის უფლების დაბრუნება არ ეხებათ იმ პირებს, რომელთაც გამოიწვიეს ავტოსაგზაო შემთხვევა, რის შედეგადაც პირი დაშავდა/გარდაიცვალა.

გორდულაძის განმარტებით, კანონპროექტში აღნიშნული ცვლილებების მიზანია "ადამიანებს ჰქონდეთ შესაძლებლობა, აიღონ მართვის მოწმობები, ამავდროულად დაფიქრდნენ, რომ სხვა მსგავსი შემთხვევის შემთხვევაში, მათ მიმართ იმოქმედებს მკაცრი სანქცია. ალკოჰოლური სიმთვრალის შემთხვევაში მათ აღარ ექნებათ მართვის მოწმობის მიღების საშუალება და საპატრულოს ხელმძღვანელს აღარ ექნება უფლება, რომ მიმართვის შედეგად, შესაბამისი შეზღუდვა მოხსნას და მართვის მოწმობა დაუბრუნოს".