თეოლოგი ბექა მინდიაშვილი საპატრიარქოს მიერ არქიმანდრიტ დოროთე ყურაშვილისთვის მღვდელმოქმედების უფლების შეჩერებას სოციალურ ქსელში ეხმაურება. ის წერს, რომ "იმის ნაცვლად, რომ საპატრიარქოს მამა დოროთე ქოცური ტერორისგან დაეცვა, თვითონ გახდა ამ ტერორის განხორციელების ინსტრუმენტი".

"ჯერ მამა ილიას შეუჩერეს მღვდლობა, ახლა მამა დოროთეს — ამით სხვებს აშინებენ, ეკლესიაში რუსული მმართველობით უკმაყოფილოებს და, ზოგადად, რუსული ოკუპაციის მოწინააღმდეგე სასულიერო პირებს.

მამა დოროთესთვის ეს გადაწყვეტილება სული წმიდის ბეჭედია, ესე იგი, ის, რასაც მამა დოროთე, მამა ილია, მამა შიო ამბობენ და აკეთებენ, ღმრთის მიერაა კურთხეული. წაიკითხეთ სახარება და მიხვდებით, რომ ასეა, გაეცანით კირიონ საძაგლიშვილის დევნის ისტორიას რუსული სინოდის მიერ, გადახედეთ ამბროსი ხელაიას სასამართლოს ოქმებს და მიხვდებით, რასთან გვაქვს რეალურად საქმე!

საპატრიარქოში ქოცური მმართველობის ურჯულოება და უბადრუკობა — ერთი მხრივ, და მეორე მხრივ — ქრისტეს კურთხევა:

ნეტარ იყუნეთ თქვენ, რაჟამს გდევნიდენ და გყვედრიდენ, და თქვან ყოველი სიტყვა ბოროტი თქვენდა მომართ სიცრუით ჩემთვის; გიხაროდენ და მხიარულ იყვენით, რამეთუ სასყიდელი თქვენი დიდ არს ცათა შინა!

მამა დოროთეს არა მარტო ყველა ჭეშმარიტი ქრისტიანი, არამედ ყველა სამშობლოსმოყვარული მოქალაქე უნდა ამოუდგეს მხარში!", — წერს ბექა მინდიაშვილი.

საქართველოს საპატრიარქომ არქიმანდრიტ დოროთე ყურაშვილს მღვდელმოქმედების უფლება შეუჩერა. ამის შესახებ მათ მიერ 15 დეკემბრით დათარიღებულ განცხადებაშია ნათქვამი.

ბრძანებაში, რომელსაც ხელს საქართველოს კათალიკოს-პატრიარქი ილია II აწერს, წერია, რომ მას მღვდელმსახურება "საეკლესიო კანონიკური ეთიკის არაერთგზისი დარღვევისათვის" შეუჩერდა.