ქართული ოცნების საპარლამენტო უმრავლესობის ლიდერი ირაკლი კირცხალია დიდი ბრიტანეთის ელჩის, გარეტ უორდის სტუდენტებთან გაკეთებულ განცხადებას გამოეხმაურა იმის შესახებ, რომ "გაერთიანებული სამეფოს პოლიტიკური ურთიერთობა საქართველოსთან დაზიანებულია". კირცხალიას თქმით, ბრიტანეთის მთავრობამ საკუთარ ხალხს უნდა მოუსმინოს და საკუთარ ქვეყანას უნდა მიხედოს.

"მცირე ბიზნესი კვდება. დიდი ბიზნესი მიდის. ადამიანებს საკუთარი კბილების ამოღება უწევთ, რადგან სტომატოლოგთან მისვლა არ შეუძლიათ. ჩვენ შემოგვყავს მიგრანტები, რომლებსაც ჩვენი ქვეყნის განადგურება სურთ — სხვადასხვა ქვეყნის წარმომადგენლებით დაკომპლექტებული ბანდები ათწლეულების განმავლობაში ახორციელებდნენ წარმოუდგენელ სექსუალურ დანაშაულებს ახალგაზრდა გოგონების წინააღმდეგ. ამ დანაშაულებს ხელისუფლება მალავდა.

ვერავის ვაძევებთ ქვეყნიდან ადამიანის უფლებათა ქსელისა და ჩვენი მართლმსაჯულების სისტემის დივერსიის გამო. ხალხი სასოწარკვეთილია, მაგრამ მათ არ აქვთ უფლება, ამაზე ისაუბრონ. თუ ტრანსგენდერული იდეოლოგების წინააღმდეგ ხმას ამოიღებთ, შეიძლება ნებისმიერ დროს, ნებისმიერ ადგილას დაგაპატიმრონ: ჰითროუს აეროპორტში, თქვენს სახლში, ოფისში.

ერი, რომელმაც სიტყვის თავისუფლება გამოიგონა და 1695 წელს დააფუძნა თავისუფალი პრესა, ახლა სახელმწიფო ცენზურის სამშობლოა. ამ კატასტროფას, ბრიტანეთის დაცემას, ინგლისის დაცემას, ლონდონის დაცემას ხელმძღვანელობს მმართველი ელიტა, რომელსაც ჩვენი ქვეყანა სძულს. რაც შეეხება კონკრეტულად BBC-ის, ის დეზინფორმაციის გამავრცელებელი მთავარი იარაღია და მიხარია, რომ პრეზიდენტმა ტრამპმა ეს ფარისევლები ამხილა".

ეს სიტყვები დიდი ბრიტანეთის ყოფილ პრემიერს, ლიზ ტრასს ეკუთვნის, რომელიც ყველაზე კარგად ასახავს დღეს იმ ქვეყნის ვითარებას, რომელიც იცლის და საქართველოს მისამართით უსამართლო, ბინძური თავდასხმებით გამოირჩევა.

საკუთარ ქვეყანას მიხედეთ, საკუთარ ხალხს მოუსმინეთ... ჩვენ არ გვაქვს არავითარი საფუძველი, რომ ლიზ ტრასის სიტყვებში ეჭვი შევიტანოთ!" — განაცხადა ირაკლი კირცხალიამ.

შეგახსენებთ, დიდი ბრიტანეთის ელჩმა გარეტ უორდმა კავკასიის უნივერსიტეტის სტუდენტებთან შეხვედრაზე თქვა, რომ "გაერთიანებული სამეფოს პოლიტიკური ურთიერთობა საქართველოსთან დაზიანებულია, რადგან არსებობს ანტიდემოკრატიული ზეწოლა ოპოზიციასა და სამოქალაქო საზოგადოებაზე".