თბილისის მერი კახა კალაძე აცხადებს, რომ წლევანდელი საახალწლო სლოგანი იქნება "სიკეთით სავსე ქალაქი". მისივე თქმით, "საახალწლო სლოგანი ძირითადად უკავშირდება წლის მიხედვით მიღწეულ შედეგებს, წარმატებებსა და იმ სულისკვეთებას, რომელიც ქალაქის მიმართ ამოძრავებთ".

"მსოფლიოში და ჩვენს ქვეყანაში მიმდინარე პროცესების გათვალისწინებით, ვფიქრობ, ყველაზე მეტად რაც გაგვაძლიერებს, რაც მთავარი მამოძრავებელი ძალა და მოტივატორია ყველა კარგი საქმის კეთების დროს — ეს არის სიკეთე. ვფიქრობ, უფრო მეტი სიკეთე გვმართებს ერთმანეთის, ჩვენი ქალაქის, გაჭირვებაში მყოფი ადამიანების, განსხვავებული პოლიტიკური აზრის მქონე მოქალაქეების მიმართ; უნდა შევძლოთ და კეთილი ზრახვით, არა ბოღმითა და შურით ვაშენოთ ჩვენი ქალაქის, ქვეყნის მომავალი; სიკეთე უნდა იყოს წამყვანი ფაქტორი ჩვენი შვილების აღზრდის საქმეში, რათა მათ შეძლონ, ღირსეულად ემსახურონ საკუთარ სამშობლოს. სწორედ ამიტომ, წლევანდელი საახალწლო სლოგანი იქნება — "სიკეთით სავსე ქალაქი", — აღნიშნა თბილისის მერმა.

ცნობისათვის, 2025 წელს საახალწლო სლოგანი იყო: "გამარჯვებებით სავსე ქალაქი".

2024 წელს — "ევროპული ქალაქი",

2023 წელს — "მშვიდობის ქალაქი",

2022 წელს — "გვიყვარდეს ერთმანეთი",

2021 წელს — "სოლიდარობით სავსე ქალაქი",

2020 წელს — "ისტორიით სავსე ქალაქი",

2019 წელს — "სიყვარულით სავსე ქალაქი",

2018 წელს — "სიცოცხლით სავსე ქალაქი".