ინტერპრესნიუსის ინფორმაციით, თეთრიწყაროს რაიონული სასამართლოს მოსამართლემ ვლადიმერ ხუჭუამ მისი განსახილველი რამდენიმე ადმინისტრაციულ სამართალდარღვევათა საქმის წარმოება შეაჩერა და კონსტიტუციური წარდგინებებით საქართველოს საკონსტიტუციო სასამართლოს მიმართა.

IPN-ის ცნობით, ხუჭუას მოთხოვნაა არაკონსტიტუციურად იქნეს ცნობილი "საქართველოს ადმინისტრაციულ სამართალდარღვევათა კოდექსში" 2025 წელს შეტანილი ცვლილებები. ხუჭუას განმარტებით აღნიშნული ცვლილებებია სამართალდარღვევის ჩადენისთვის დაკისრებული ჯარიმის გადაუხდელობისას, ადმინისტრაციული პატიმრობის სავალდებულო გამოყენება და მარიხუანის მცირე ოდენობით უკანონოდ შენახვისთვის სატრანსპორტო საშუალების მართვის და სხვა უფლებების 3 და 5 წლით ჩამორთმევა.

"შეტანილი ცვლილებები არის კონსტიტუციის შეუსაბამო და შესაბამისად ვთვლი, რომ საკონსტიტუციო სასამართლომ უნდა განიხილოს ეს საკითხები და მიიღონ შესაბამისი გადაწყვეტილება. მე კონკრეტული პირების მიმართ შევაჩერე საქმის წარმოება და კონსტიტუციური წარდგინებებით მიმართონ საკონსტიტუციო სასამართლოს. აქ საუბარი არის იმაზე, რომ როდესაც ვთქვათ ადამიანი პოლიციის დაუმორჩილებლობისთვის მას დაეკისრება სახდელი ჯარიმა, თუ ვერ გადაიხდის ამ ჯარიმას მისი ფინანსური და სოციალური მდგომარეობიდან გამომდინარე, თუ მის წინააღმდეგ მომავალშიც სამართალდარღვევის საქმე იქნება გამოკვეთილი, სასამართლო ვალდებულია მას შეუფარდოს მინიმუმ 30-დღიანი ადმინისტრაციული პატიმრობა, რაც ვთვლი, რომ კონსტიტუციისთვის შეუსაბამოა და არღვევს ადამიანის ძირითად უფლებებს," — განუცხადა ხუჭუამ "ფორმულას".

შეგახსენებთ, 2024 წლის 4 ნოემბერს რაიონულმა სასამართლომ წალკისა და თეთრიწყაროს მუნიციპალიტეტებში დაახლოებით 30 უბნის საარჩევნო შედეგების გაუქმების გადაწყვეტილება მიიღო. სხდომათა დარბაზში ექსპერიმენტი სწორედ ვლადიმერ ხუჭუას ინიციატივით ჩატარდა, რამაც დაადასტურა, რომ ხმის მიცემის დროს ამომრჩევლის ნების ფარულობა ირღვეოდა.

თბილისის სააპელაციო სასამართლომ, 7 ნოემბერს, რაიონული სასამართლოს გადაწყვეტილება გააუქმა.