პარტია გახარია საქართველოსთვის წევრმა გიორგი შარაშიძემ 28 ნოემბრის აქციაზე საუბრისას განაცხადა, რომ მის პარტიას "პარლამენტში ყოფნით გაცილებით სწორი და ეფექტური წინააღმდეგობის გაწევა შეუძლია ოცნებისთვის, ვიდრე ქუჩიდან".

"იმიტომ ვართ დღეს აქ, რომ მიგვაჩნია, ჩვენი აქ ყოფნით გაცილებით სწორი და ეფექტური წინააღმდეგობის გაწევა შეგვიძლია ოცნებისთვის, ვიდრე ამ შემთხვევაში, ქუჩიდან. ეს არის და ეს, თორემ ჩემი პატივისცემა ყველა იმ ადამიანს, ვინც გულწრფელად არის აღშფოთებული ოცნების მოღალატეობრივი საქციელით. გიმეორებთ, რომ ამ პროცესზე სრული პასუხისმგებლობა ეკისრება ოცნებას. 2024 წლის 28 ნოემბერი რომ არის ქვეყნის ინტერესების ღალატის დღე, რომელიც ოცნებამ და კობახიძემ ჩაიდინა, ამას აქედან, პარლამენტის ტრიბუნიდან გეუბნებით და დარწმუნებული ვარ, ამაზე მწვავე ვერც ერთ განცხადებას ვერ მოისმენთ დღეს, მათ შორის, ქუჩიდან. უბრალოდ, თქვენ მოგწონთ ქუჩიდან ყვირილი, ჩვენ უფრო კარგად გამოგვდის, მათ შორის, ტრიბუნიდან საუბარი", — განაცხადა გიორგი შარაშიძემ 28 ნოემბრის აქციაზე საუბრისას, რომელსაც მისი პარტია არ უერთდება.