28 ნოემბერს, 19:00 საათიდან, თსუ-დან, საზოგადოებრივი მაუწყებლიდან და ევროპის მოედნიდან საპროტესტო მსვლელობები მოეწყობა რუსთაველის გამზირისკენ.

"ერთი წლის შემდეგ, 28 ნოემბერს, ჩვენ, ქართული საზოგადოება ისევ გამოვდივართ — ისევ იქ, სადაც ყველაფერი დაიწყო; უფრო ძლიერები, ვიდრე ერთი წლის წინ.

ბოლო კვირებმა გვაჩვენა, რომ რეჟიმს ყველაზე მეტად მოქალაქეებთან პირისპირ დარჩენის ეშინია, განსაკუთრებით, როცა მოქალაქეები ქვეყნის კეთილდღეობის სურვილით, უანგაროდ და საერთო მიზნის გარშემო ერთიანდებიან.

და ჩვენ სწორედ ასე გამოვალთ — ერთად, მშვიდად და პასუხისმგებლობით, ქვეყნის მომავლის დასაცავად.

მოდი, 28 ნოემბერს რუსთაველზე, ერთად დავიცვათ ის, რაც გვაერთიანებს - ჩვენი თავისუფლება და ევროპული მომავალი", — წერია ორგანიზატორების განცხადებაში.

ამის პარალელურად, საპროტესტო აქციებს გამართავენ ემიგრანტები მსოფლიოს 20-ზე მეტ ქალაქში, მათ შორის: პარიზში, ჰააგაში, ჰამბურგში, რომში, ფრანკფურტში, შტუტგარტში, ციურიხში, ლონდონში, სტრასბურგში, კიოლნში, ჰანოვერში, ვენაში, ჟენევაში, რიგაში, სტოკჰოლმში, ტალინში, ბერლინში, მილანში, სიდნეიში.

"28 ნოემბერს გადის ერთი წელი მას მერე, რაც ირაკლი კობახიძემ განაცხადა, რომ საქართველო წყვეტს ევროინტეგრაციისკენ სწრაფვას. ამ სამარცხვინო განცხადების შემდეგ საქართველოში პროტესტი არ შეწყვეტილა არც ერთი დღე!

28 ნოემბერს არაერთ ქალაქში საქართველოს ფარგლებს გარეთ დაანონსებულია აქცია ქართველი ემიგრანტების მიერ", — წერია გავრცელებულ განცხადებაში.