"რთულია ოპერირება დიქტატურაში. ჩემი აზრით, ჩვენ არ უნდა ველოდოთ სასწაულებს, ლიდერები არიან ციხეში, ფინანსური რესურსი მათ არ აქვთ. დრო არის მათი გაერთიანების", — ამის შესახებ საქართველოს მე-5 პრეზიდენტმა სალომე ზურაბიშვილმა 26 ნოემბერს პარიზში Sciences Po-ში საქართველოში მიმდინარე პოლიტიკურ პროცესებთან საუბრისას განაცხადა.

მისი თქმით, "მუშაობა, სხვადასხვა ტექნიკის გამოყენებაა საჭირო, რომ რუსულ პროპაგანდას შევეწინააღმდეგოთ".

"პოლიტიკური პარტიების მდგომარეობა ძალიან რთული და განსხვავებულია. მე ვცდილობ მათ კოორდინაციას, კრიტიკულად ვარ განწყობილი მათ მიმართ, მაგრამ აქვე ვაცნობიერებ, რომ რთულია ოპერირება დიქტატურაში. ჩემი აზრით, დღეს არ არის პოლიტიკური პარტიების დრო, ჩვენ არ უნდა ველოდოთ სასწაულებს, ლიდერები არიან ციხეში, ფინანსური რესურსი მათ არ აქვთ. დრო არის მათი გაერთიანების, ძალების თანხვედრის პარტიებსა და სამოქალაქო საზოგადოებას შორის იმისთვის, რომ მიღწეულ იქნას საპარლამენტო არჩევნები.

როცა რუსულმა პროპაგანდამ დაიწყო მტკიცება, რომ ევროპას სურდა მეორე ფრონტის გახსნა საქართველოში, ჩემი რეაქცია იყო სიცილი და ჩვენ ყველა ვიცინოდით. რადგან როგორ შეიძლება იმის დაჯერება, რომ მშვიდობიან მეგობარ ევროპას სურს ომის დაწყება. როცა ტერიტორიები ოკუპირებულია რუსეთის მიერ. მაგრამ ეს პროპაგანდა გაძლიერდა, გამყარდა და იმუშავა. ახლა ახალი პროპაგანდაა დაწყებული, რომელიც ასევე მოდის რუსეთიდან, ეს ეხება ნეიტრალიტეტს. იგივენაირად, როგორ შეიძლება ქართველებმა დაიჯერონ, რომ ნეიტრალიტეტი მუშაობს, როცა ჩვენ გამოცდილი გვაქვს წინა საუკუნეში. აღარ ვფიქრობ, რომ ამაზე სიცილის დროა. ჩვენ გვჭირდება სპეციალური მუშაობა, სხვადასხვა ტექნიკის გამოყენება, რომ ამ პროპაგანდას შევეწინააღმდეგოთ", — თქვა სალომე ზურაბიშვილმა (თარგმანს "ტვ პირველი" ავრცელებს).

მან საჯარო ლექციაზე დიასპორისთვის უცხოეთში არჩევნებში ხმის მიცემის შეზღუდვაზეც ისაუბრა. მისი თქმით, "საქართველოს არალეგიტიმურმა მთავრობამ მიიღო გადაწყვეტილება, რომ დიასპორას შეუზღუდოს ხმის უფლება. რადგან კარგად იციან რომ დიასპორა ძალიან ძლიერი ინსტრუმენტია, თუ ის ორგანიზებული იქნება".

"ქართული დიასპორა შედარებით ახალია, ეს არ არის ისტორიული დიასპორა, ის ბოლო ორი ათწლეულის განმავლობაში ჩამოყალიბდა მას შემდეგ, რაც გაიხსნა საზღვრები და ხალხმა გასვლა დაიწყო. ეს არის ახალი და ნაკლებად ორგანიზებული დიასპორა, რომელმაც არ იცის ის სიძლიერე რაც მას გააჩნია. მათთვის მთავარია კონსოლიდაცია. სწორედ ამიტომ საქართველოს არალეგიტიმურმა მთავრობამ მიიღო გადაწყვეტილება, რომ მათ შეუზღუდოს ხმის უფლება. რადგან მათ კარგად იციან რომ დიასპორა თავის მხრივ ძალიან ძლიერი ინსტრუმენტია თუ ის ორგანიზებული იქნება და ამის მცდელობას ჩვენ ნელ-ნელა უკვე ვხედავთ. ახლა უფრო მეტი კონსოლიდაციაა საჭირო", — განაცხადა სალომე ზურაბიშვილმა საჯარო ლექციაზე.

გუშინ, სალომე ზურაბიშვილს პარიზის საერთაშორისო ურთიერთობების სკოლამ უმასპინძლა 60-წუთიან საჯარო სესიით, რომელსაც სკოლის დეკანი არანჩა გონსალესი უძღვებოდა. დისკუსიისას პრეზიდენტმა მიმოიხილა: საქართველოს მიმდინარე პოლიტიკურ პროცესები და ქვეყნის სტრატეგიულ მისწრაფებები, ევროპის დღევანდელი მდგომარეობა და რუსეთისგან მომდინარე გამოწვევები და დემოკრატიული მდგრადობის გაძლიერების მნიშვნელობა.