ოცნების პარლამენტმა მესამე მოსმენით მხარი დაუჭირა დაჩქარებული წესით განხილვისთვის მოთხოვნილ კანონპროექტებს.

ერთი მათგანი ეხება პირადობის მოწმობისა და საქართველოს მოქალაქის პასპორტის გაცემის წესში ცვლილებებს.

"საქართველოს მოქალაქეთა და საქართველოში მცხოვრებ უცხოელთა რეგისტრაციის, პირადობის (ბინადრობის) მოწმობისა და საქართველოს მოქალაქის პასპორტის გაცემის წესის შესახებ" კანონპროექტს მხარი პარლამენტის 88 წევრმა დაუჭირა.

კანონპროექტი საქართველოს მოქალაქის პირადობის ელექტრონული მოწმობის, დროებითი ბინადრობის ელექტრონული მოწმობის, მუდმივი ბინადრობის ელექტრონული მოწმობის, დროებითი საიდენტიფიკაციო მოწმობისა და ბიომეტრიული პასპორტის ტექნიკური მახასიათებლების დახვეწას უკავშირდება.

ოცნების პარლამენტმა "საქართველოს საგადასახადო კოდექსში ცვლილების შეტანის შესახებ" კანონპროექტი 85 ხმით ერთხმად, მესამე მოსმენით მიიღო.

ცვლილებების პროექტი სიგარეტის აქციზის განაკვეთის ცვლილებას და სიგარეტის ადგილობრივი წარმოების ხელშეწყობას ითვალისწინებს.

კანონპროექტით, ადგილობრივი წარმოების 35 მილიონ კოლოფამდე სიგარეტზე ფიქსირებულად 1.3 ლარი აქციზი და 15%-იანი ადვალური აქციზის გადასახადი წესდება.

ასევე, იმპორტირებულ სიგარეტზე აქციზის ფიქსირებული განაკვეთი 1.9 ლარიდან 2.75 ლარამდე იზრდება, ხოლო ადვალური განაკვეთი — 30%-დან 20%-მდე მცირდება.