"ოცნების" პარლამენტმა 76 ხმით 9-ის წინააღმდეგ "საქართველოს საარჩევნო კოდექსის" ახალი რედაქცია პირველი მოსმენით მიიღო.

საკანონმდებლო ცვლილების თანახმად: საზღვარგარეთ მყოფი მოქალაქეები არჩევნებში მონაწილეობას ვერ შეძლებენ, 4 წელიწადში ერთხელ, სამშობლოში თუ არ ჩამოვლენ ხმის მისაცემად. თუმცა, ეს საარჩევნო კოდექსში შესატანი ერთადერთი ცვლილება არ არის.

საარჩევნო კოდექსში დაგეგმილი ცვლილებებით:

• იცვლება საარჩევნო კომისიის წევრად არჩევის/დანიშვნის ნორმა — ნასამართლობის მქონე პირი ვერ გახდება საარჩევნო კომისიის წევრი, მათ შორის იმ შემთხვევაშიც, თუ მას სასჯელის სახით მხოლოდ ჯარიმა აქვს შეფარდებული. საარჩევნო კოდექსის ძირითად ტექსტში განისაზღვრება არჩევნებში იმ ამომრჩევლის მონაწილეობის წესი, რომელიც საცხოვრებელი ადგილის მიხედვით რეგისტრაციიდან მოიხსნა, ან რომლის რეგისტრაციაც ძალადაკარგულად გამოცხადდა სააგენტოს გადაწყვეტილებით, ან რომელიც რეგისტრირებულია მისამართის მითითების გარეშე, ან რეგისტრირებულია საზღვარგარეთ

• ზუსტდება ფოტოვიდეოგადაღების წესები: დგინდება, რომ კენჭისყრის შენობაში ყოფნის უფლების მქონე პირს, ასევე საარჩევნო კომისიის სხდომაზე დასწრების უფლების მქონე პირს ფოტოგადაღება შეუძლიათ აუდიო-მონიტორინგის გარეშე.

• იცვლება კენჭისყრის დღეს შენობიდან გაძევების საკითხები: კენჭისყრის შენობიდან გაძევებულ პირს აეკრძალება ყველა სხვა კენჭისყრის შენობაში შესვლა, რისთვისაც საარჩევნო ადმინისტრაცია განახორციელებს შესაბამისი პირების შესახებ მონაცემთა აღრიცხვას;

• იცვლება კანდიდატების რეგისტრაციის პროცედურები – წარსადგენი აღარ იქნება სააღრიცხვო ბარათი. ამჟამად, კანდიდატის რეგისტრაციის მიზნით წარსადგენია მის მიერ შევსებული ორი დოკუმენტი — სააღრიცხვო ბარათი და პარტიული კუთვნილების შესახებ განაცხადი. პროექტის თანახმად, რეგისტრაციის მიზნით კანდიდატი შეავსებს მხოლოდ არჩევნების მონაწილეობის თანხმობის ფორმას, სადაც თანხმობასთან ერთად აღინიშნება ბინადრობის ცენზისა და პარტიული კუთვნილების შესახებ ინფორმაცია;

• იცვლება და ერთგვაროვანი ხდება კანდიდატების წარდგენისა და რეგისტრაციაზე უარის/რეგისტრაციის გაუქმების საფუძვლები. პროექტის თანახმად, პარტია უფლებამოსილი იქნება კანდიდატად წარადგინოს მხოლოდ ამ პარტიის წევრი, ხოლო საინიციატივო ჯგუფი-წარადგენს უპარტიო კანდიდატს. სხვა შემთხვევაში კანდიდატი არ გატარდება რეგისტრაციაში ან რეგისტრირებულ კანდიდატს გაუუქმდება რეგისტრაცია.

• ზუსტდება ზოგიერთი ტერმინის განმარტება, მათ შორის არჩევნების, რეფერენდუმის/პლებისციტის საქართველოს სახელმწიფოს საზღვრებში გამართვის კუთხით;

ოცნების პარლამენტის საპროცედურო საკითხთა კომიტეტის თავმჯდომარის, დავით მათიკაშვილის განცხადებით, აღნიშნული ცვლილების მიზანი ის არის, რომ საარჩევნო დღეს ემიგრატები საქართველოში ჩამოვიდნენ.

"ამ დათქმის მიზანი სწორედ ის არის, რომ არჩევნების დროს ემიგრანტები სამშობლოში მასობრივად ჩამოვიდნენ და ამ ძალიან მნიშვნელოვან დღეს ის პასუხისმგებლობა გაიზიარონ, რაც ქვეყნის სუვერენიტეტს, მის მომავალი ოთხი წლით მართვასა და სახელისუფლებო რგოლის დაკომპლექტებას უკავშირდება", — აღნიშნა დავით მათიკაშვილმა.

მათიკაშვილის განცხადებით, 2011 წელს მიღებულ "საარჩევნო კოდექსში" დღემდე 100-მდე ცვლილება და დამატება შევიდა.

"შესაბამისად, თანამედროვე გამოწვევების გათვალისწინებით, დღის წესრიგში ორგანული კანონის ტექსტის გადამუშავების, მსგავსი ნორმების გაერთიანების, გარდამავალ დებულებებში არსებული კონკრეტული რეგულაციების კანონის მოქმედების ვადით დადგენის და დაწესების, აგრეთვე, კანონში კონკრეტული პრინციპული საკითხების ასახვის საჭიროება დადგა", — აღნიშნა დავით მათიკაშვილმა.

კანონპროექტის ავტორები და ინიციატორები არიან საქართველოს პარლამენტის წევრები: არჩილ გორდულაძე, თორნიკე ჭეიშვილი, ალექსანდრე ტაბატაძე, დავით მათიკაშვილი, რატი იონათამიშვილი, ალუდა ღუდუშაური, თენგიზ შარმანაშვილი, გურამ მაჭარაშვილი, აკაკი ალადაშვილი.