სტრესზე ჩვენი პასუხი, როგორც წესით, საკუთარი თავის უფრო მეტად დატვირთვაა ხოლმე — ეკრანთან უფრო მეტ ხანს და მეტი ძალისხმევის ხარჯზე ჯდომა, ყავის მორიგი ფინჯანი.

არადა, ჩვენს სხეულსაც და გონებასაც ამ დროს სულ ცოტა დასვენება სჭირდება. საუკეთესო გზა კი, ამ შემთხვევაში, რამდენიმე წუთიანი სეირნობაა — სტრესის გადასამუშავებლად, კონცენტრაციის უნარის აღსადგენად, ორგანიზმის გადასატვირთად — თქვენი გონებისა და სხეულის უკეთესად ფუნქციონირებისთვის.

განწყობის გაუმჯობესება

სეირნობა მარტივი, მაგრამ მძლავრი საშუალებაა სამუშაოსთან დაკავშირებული სტრესის წინააღმდეგ. მსგავსი ფიზიკური აქტივობის დროს ორგანიზმში სეროტონინი და ენდორფინი გამოიყოფა. ეს ნეიროტრანსმიტერები განწყობის გამოსწორებაზეც მუშაობს, მოქმედებს როგორც ბუნებრივი ტკივილგამაყუჩებელი და შფოთვის სიმპტომებსაც ებრძვის და ამცირებს. შედეგად, ჩვენი პროდუქტიულობაც იზრდება და უფრო მეტად შემოქმედებითიც ვხვდებით.

რჩევა: როცა მუშაობის დროს, შეფერხებას იგრძნობთ, აზრებსაც ვეღარ უყრით თავს და გასაგრძელებლადაც დიდი დრო და ძალისხმევა გჭირდებათ, სიარული სცადეთ — ამით გონებას დასვენების შესაძლებლობას მისცემთ, მეტ ჟანგბადსაც მიაწვდით და საქმეც უფრო მარტივი შესასრულებელი გახდება.

პროდუქტიულობის ზრდა

სეირნობის მოკლე შესვენება რამდენიმე სიკეთეს ერთდროულად მოგიტანთ:

• ფოკუსირება და სიფხიზლე: მოძრაობა ტვინში სისხლის მიმოქცევას აძლიერებს, , რაც ჟანგბადისა და გლუკოზის მიწოდებას აუმჯობესებს — ეს კი კონცენტრაციისა და კოგნიტური ფუნქციებისთვის აუცილებელია.
• სიცხადე გადაწყვეტილებების მიღებისას: იმ საქმისგან დისტანცირება, რომლის შესრულებასაც საჭიროზე მეტ დროს უთმობთ, საშუალებას მოგცემთ საკითხის სხვა კუთხიდან, სხვა პერსპექტივით შეხედოთ — რაც ნამდვილად აადვილებს პროცესს.

რჩევა: თანმიმდევრულობა მნიშვნელოვანია. მაშინაც კი, თუ გარეთ გასვლა არ შეგიძლიათ, შენობაში გადაადგილებაც კი მნიშვნელოვანი და სასარგებლოა. შეეცადეთ, იაროთ ტელეფონზე ლაპარაკის დროს, ყოველთვის ისარგებლოთ კიბით ან უკიდურეს შემთხვევაში, ადგილზე იმოძრაოთ, ამითაც კი დაეხმარებით ორგანიზმს.

ბუნებრივი სინათლის ძალა

დღის განმავლობაში გარეთ სეირნობა მაქსიმალურად ზრდის თქვენს კავშირს ბუნებრივ სინათლესთან, რაც, გარდა იმისა, რომ დე ვიტამინის მიღების დამატებითი შესაძლებლობაა, ორგანიზმისთვის არის სიგნალი, რომ ღამის ძილისთვის საჭირო მელატონინი დროულად გამოიმუშაოს.

თქვენმა სხეულმა ყველაზე კარგად იცის, როგორ მოდუნდეს, თუ მას ამის საშუალებას მისცემთ.

მომდევნო ჯერზე, როდესაც სამუშაო დღე მძიმე მოგეჩვენებათ და გადაღლასაც იგრძნობთ, დაუთმეთ 15 წუთი დღის შუქზე, ღია ცის ქვეშ სეირნობას და შედეგით უკიდურესად კმაყოფილი დარჩებით.