საქართველოს ახალგაზრდა იურისტთა ასოციაციაში მიიჩნევენ, რომ თბილისის საკრებულომ თაბორი რიზორთსა და თბილისი სითის მიწის ნაკვეთები არ უნდა გადასცეს. ორივე კომპანია საქართველოს ყოფილ პრემიერ-მინისტრთან და მმართველი პარტიის დამფუძნებელთან, ბიძინა ივანიშვილთანაა დაკავშირებული.

ორგანიზაცია თბილისის საკრებულოს მოუწოდებს იხელმძღვანელოს და დაიცვას საქართველოს კანონმდებლობა და მხარი არ დაუჭიროს თბილისის მერიის მიერ გაგზავნილი განკარგულებების და ხელშეკრულებების პროექტებს.

საიაში ამბობენ, რომ პროექტის ისტორიული ლანდშაფტის დაცვის ზონაში განხორციელება დასტურდება საქართველოს კულტურისა და ძეგლთა დაცვის სამინისტროს მიერ 2016 წელს მიწოდებული ოფიციალური დოკუმენტით (რუკა). ამიტომ ორგანიზაციაში მიაჩნიათ, რომ კულტურული მემკვიდრეობის შესახებ საქართველოს კანონის თანახმად, მსგავსი პროექტების ისტორიული ლანდშაფტის დაცვის ზონაში განხორციელება დაუშვებელია.

საია-სთვის მიუღებელია თბილისი სითისთვის ერთ ლარად მიწის ნაკვეთის გადაცემა მილიონი ლარის ინვესტირების განხორციელებისა და 30 მიწისქვეშა ავტოსადგომების მოსაწყობად "მაღალი საზოგადოებრივი ინტერესის" მქონე შემთხვევა არაა.

"1 900 მ2 მიწის ნაკვეთის სიმბოლურ ფასად გადაცემა არის დაუსაბუთებელი და ეწინააღმდეგება მუნიციპალიტეტის საკუთრებაში არსებული ქონების რაციონალურად განკარგვას", - ამბობენ საიაში.

დღეს, 10 ოქტომბერს თბილისის საკრებულო ოქროყანის დასახლებაში მდებარე 4 400 მ2 მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 მ2 მიწის ნაკვეთის პირდაპირი განკარგვის ფორმით პრივატიზების საკითხებს განიხილავს.