ოკუპირებული აფხაზეთის მართლმადიდებელმა ეკლესიამ სოხუმის საკათედრო ტაძრის გარდა ყველა სხვა ტაძარში ღვთისმსახურება შეაჩერა და ხელისუფლებას მოუწოდა, მიიღოს ზომები ახალი ათონის მონასტერზე კონტროლის დასამყარებლად, სადაც ამჟამად "მეამბოხე" მღვდელი მოღვაწეობს.

ეკლესიამ ორშაბათს "ტელეგრამზე" გავრცელებულ განცხადებაში ხელისუფლებას მოუწოდა, "ფრთხილად შეისწავლონ მიმდინარე პროცესები, ჩაატარონ მდგომარეობის დეტალური ანალიზი და მიიღონ დაბალანსებული გადაწყვეტილებები, რომლებიც სიმშვიდის, ერთობისა და საეკლესიო ჭეშმარიტების შენარჩუნებას შეუწყობს ხელს".

"სანამ ზემოაღნიშნული საეკლესიო საკითხები არ მოგვარდებოდა, აფხაზეთის მართლმადიდებელი ეკლესიის საეკლესიო საბჭოსა და სამღვდელოებმა გადაწყვიტეს, რომ ღვთისმსახურება ჩატარდეს მხოლოდ ყოვლადწმინდა ღმრთისმშობლის ხარების სახელობის სოხუმის ტაძარში", — აღნიშნულია განცხადებაში.

მსახურებების შეჩერება აფხაზეთის დე ფაქტო რესპუბლიკის მართლმადიდებელ ეკლესიასა და 2011 წელს ახალი ათონის მონასტერში წარმოქმნილ დისიდენტურ მოძრაობას — "აფხაზეთის წმინდა მიტროპოლიას" შორის არსებულ კონფლიქტთანაა დაკავშირებული.

ეკლესია აცხადებს, რომ ახალი ათონის მონასტერი — აფხაზეთის მართლმადიდებლური სარწმუნოების უდიდესი ცენტრი — უნდა დაუბრუნდეს მის დაქვემდებარებას, ხოლო "მოღალატე ბერი დოროთეოსი (დბარი)", რომელიც დისიდენტურ მოძრაობას ხელმძღვანელობს, ტერიტორიიდან უნდა გააძევონ.

"ახალ ათონში საეკლესიო ცხოვრებასთან დაკავშირებით არსებულ ვითარებაში, მოგმართავთ ლოცვით, სიტუაციის საფუძვლიანი შესწავლისა და სიმართლის დაცვის თხოვნით. მნიშვნელოვნად მიგვაჩნია, რომ სახელმწიფო ორგანოებმა დაიკავონ პოზიცია, რომელიც ხელს შეუწყობს მშვიდობის, ერთიანობისა და საეკლესიო წესრიგის შენარჩუნებას", — ნათქვამია განცხადებაში.

"აფხაზეთის მართლმადიდებელი ეკლესიის კურთხევის გარეშე არავის აქვს უფლება ჩაატაროს რომელიმე ღვთისმსახურება მის ტერიტორიაზე", — წერს ეკლესია. "საეკლესიო წესების მიხედვით, ასეთი ქმედება ეკლესიის წინააღმდეგ აჯანყებად აღიქმება."

ეკლესიის თქმით, მათი მიზანი აფხაზ მართლმადიდებელ ქრისტიანებს შორის დაპირისპირების თავიდან აცილებაა, ამიტომ მიმართავენ "ყველას — მოსკოვის საპატრიარქოს, აფხაზეთის ხელისუფლებას და მართლმადიდებელ აფხაზ ხალხს — რომ გაიგონ ჩვენი ხმები და ხელი შეგვიწყონ საეკლესიო წესრიგის აღდგენაში".

დაპირისპირების მთავარი მიზეზი აზრთა სხვადასხვაობაა იმაზე, თუ რა გზით უნდა მიაღწიოს აფხაზეთის ე.წ მართლმადიდებლურმა ეკლესიამ დამოუკიდებლობას საქართველოს მართლმადიდებლური ეკლესიისგან და რამდენად უნდა დაეყრდნოს ამ პროცესში მოსკოვს.

ოკუპირებული აფხაზეთის მართლმადიდებელმა ეკლესიამ დამოუკიდებლობა 2009 წელს გამოაცხადა, თუმცა ამ გადაწყვეტილებას არც ერთი სხვა მართლმადიდებელი ეკლესია — მათ შორის, არც რუსული აღიარებს.

მამა ვისარიონის (აფლია) ხელმძღვანელობით მოქმედი აფხაზეთის დე ფაქტო რესპუბლიკის მართლმადიდებელი ეკლესია მიიჩნევს, რომ მოსკოვის საპატრიარქოს უნდა დაეყრდნოს, რათა მათი მეშვეობით მსოფლიო მართლმადიდებლობას დაუკავშირდეს და აღიარება მიიღოს.

დოროთეოსი კი ამტკიცებს, რომ ეკლესიამ პირდაპირ კონსტანტინოპოლის მსოფლიო პატრიარქს უნდა მიმართოს.

სქიზმა 2011 წლის მაისში დაიწყო, როდესაც ახალი ათონის მონასტერში დაახლოებით 2000-მა მორწმუნემ ანაკოფიისა და ახალი ათონის წმინდა მიტროპოლიის გამოცხადებას მისცა ხმა იმ გეგმით, რომ შეექმნათ აფხაზეთის ავტოკეფალური ეკლესია, რომლის მეთაურადაც დოროთეოსი დაინიშნებოდა.

ხმის მიცემა ოკუპირებული აფხაზეთისა და რუსეთის მართლმადიდებელი ეკლესიების ეპარქიული კრებების, ასევე აფხაზეთის ხელისუფლების გაფრთხილებების მიუხედავად მაინც გაიმართა.

ოპონენტებმა შეხვედრა "კანონიკური სიწმინდის დარღვევად" შეაფასეს, დოროთეოსმა კი განაცხადა, რომ მას მხოლოდ "ციხე ან ფიზიკური ლიკვიდაცია" შეაჩერებდა.

მას შემდეგ დოროთეოსი ახალი ათონის მონასტერში ღვთისმსახურებას განაგრძობს და მნიშვნელოვან მხარდამჭერობასაც იძენს.

აფხაზეთის დე ფაქტო რესპუბლიკის მართლმადიდებელმა ეკლესიამ მას მრავალჯერ მოუწოდა, შეწყვიტოს თავისი საქმიანობა. ყველაზე ბოლოს, ივნისში, ვისარიონმა და კიდევ 18-მდე მოძღვარმა, მათ შორის დოროთეოსის ყოფილმა მხარდამჭერმა, მონასტრის დატოვება ხელმოწერილი ულტიმატუმით მოსთხოვეს .

დოროთოსმა უპასუხა, რომ ის "წვრილმან პროვოკაციებს" არ აყვება.

"განურჩევლად ვითარებისა, მე ჩემს გზას ვაგრძელებ და სანამ ვიცოცხლებ, ჩემს სამწყსოს არ მივატოვებ. მთელი ძალით დავიცავ აფხაზეთის ეკლესიის ინტერესებს — რა ფასადიც არ უნდა დამიჯდეს. ბოლოს ყველას ისტორია განგვსჯის".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.