"კლუნების ფონდი სამართლიანობისთვის" მზია ამაღლობელის საქმეზე სააპელაციო სასამართლოს გადაწყვეტილებას ეხმაურება, რომელმაც მისი განაჩენი — 2-წლიანი პატიმრობა ძალაში დატოვა.

კლუნების ფონდის მიერ გავრცელებულ ინფორმაციაში წერია, რომ სააპელაციო სასამართლოს გამამტყუნებელი განაჩენი კიდევ ერთი დარტყმაა პრესის თავისუფლებისთვის და საგანგაშო სიგნალია.

"ჟურნალისტ მზია ამაღლობელის საქმეზე სააპელაციო სასამართლოს გამამტყუნებელი განაჩენი 2-წლიანი პატიმრობის შესახებ, კიდევ ერთი დარტყმაა პრესის თავისუფლებაზე და საგანგაშო სიგნალია.

მისი საქმის უზენაეს სასამართლოში განხილვის შემდეგ, #TrialWatch მომდევნო კვირების განმავლობაში გამოაქვეყნებს ანგარიშს, რომელშიც შეისწავლის მის წინააღმდეგ წარმოებული სამართალწარმოების სამართლიანობას. #თავისუფლებამზიას", — წერია გავრცელებულ განცხადებაში.

ქუთაისის სააპელაციო სასამართლომ "ბათუმელებისა" და "ნეტგაზეთის" დამფუძნებლის მზია ამაღლობელის განაჩენი ძალაში დატოვა. ბათუმის საქალაქო სასამართლოს მოსამართლე ნინო სახელაშვილმა მას 2-წლიანი პატიმრობა 6 აგვისტოს მიუსაჯა. მოსამართლემ ბრალი გადააკვალიფიცირა და მზია ამაღლობელი დამნაშავედ ცნო არა პოლიციელზე თავდასხმის, არამედ პოლიციელის წინააღმდეგობის მუხლით.