ბავშვთა უფლებადამცველი ანა არგანაშვილი "ქართული ოცნების" საკანონმდებლო ინიციატივას ეხმაურება, რომელიც "კანონთან კონფლიქტში მყოფი არასრულწლოვანის" არასრულწლოვანთა რეაბილიტაციისა და მხარდაჭერის სახლში განთავსებას ითვალისწინებს.

უფლებადამცველი წერს, რომ "ყველა 24-საათიანი "სახლი" თუ სასახლე რეზიდენტული დაწესებულება ანუ ბავშვების წამების ადგილია, რომელიც CRPD -ის მიხედვით სრულიად აკრძალულია". ანა არგანაშვილის თქმით, ქართული ოცნება თუ ამ ცვლილებას მიიღებს, გაასაჩივრებენ.

"მოკლედ ვიტყვი დღევანდელ საკანონმდებლო ცვლილებაზე: ბავშვების მხარდაჭერა ან რეაბილიტაცია თუ გინდა, ამას რომელიმე შენობაში ბავშვების გამოკეტვით ვერ გააკეთებ. ნებისმიერ დაწესებულებაში ანუ რეზიდენტულ ბავშვთა სახლებში გამოკეტვით ბავშვებს გაწირავ წამების, ძალადობის, ტანჯვის და ცხოვრების გაფუჭებისთვის. ყველა 24-საათიანი "სახლი" თუ სასახლე არის რეზიდენტული დაწესებულება ანუ ბავშვების წამების ადგილი, რომელიც CRPD -ის მიხედვით სრულიად აკრძალულია.

თუ მიიღებთ ცვლილებას, ბავშვებს დავიცავთ და გაგისაჩივრებთ. ხოლო ბავშვებისგან ნასესხები დრო როცა ამოგეწურებათ, მაგ ბავშვების იმედზე იქნებით, არც თუ იმედიანად.

დღეს და ხვალ ბავშვთა უფლებების და ძალადობისგან დაცვის დღეებია, ასევე გაეროს ბავშვის უფლებათა კონვენციის შექმნის დღე. ყველა ქვეყანა ამაყობს, რა გააკეთა ბავშვების უფლებების დაცვისთვის და ამ დროს ჩემი ქვეყანა აანონსებს რომ 14 წლამდე ბავშვებს სპეციალურ დაწესებულებაში ანუ ციხეში aka "სახლში" გამოკეტავს, იმიტომ რომ თურმე საშიშები არიან", — წერს ანა არგანაშვილი.