ოცნების ხელისუფლების საგარეო საქმეთა მინისტრმა, მაკა ბოჭორიშვილმა სამთავრობო ტელეკომპანია "იმედის ეთერში განაცხადა, რომ "დეზინფორმაცია და მანიპულაციაა, როდესაც ვინმე ამბობს, რომ საქართველომ შეაჩერა ევროკავშირში გაწევრიანების პროცესი”.

"მოდით, მივყვეთ ყველაფერს ნაბიჯ-ნაბიჯ, რასაც ამბობენ და ეს ყველაფერი არის ტყუილი. ერთი სიტყვით რომ შევაფასოთ, ეს არის ტყუილი. ეს არის დეზინფორმაცია და მანიპულაცია, როდესაც ვინმე ამბობს, რომ საქართველომ შეაჩერა ევროკავშირში გაწევრიანების პროცესი. მარტივად - ეს წინადადება არის ტყუილი. საქართველოს არაფერი შეუჩერებია. საქართველომ სცადა ევროინტეგრაცია, ევროკავშირში გაწევრიანების საკითხი არ ყოფილიყო პოლიტიკური ბრძოლის იარაღად გამოყენებული. ეს სცადა საქართველოს ხელისუფლებამ. თუმცა, ეს ყველაფერი შემოატრიალეს და მანიპულაციურად იყენებენ იმისთვის, თითქოს საქართველომ შეაჩერა დიალოგი.

დიალოგი შეჩერდა სინამდვილეში ბევრად უფრო ადრე, ვიდრე ის განცხადება გაკეთდა, რომ აპელირებენ — ეს იყო ივნისში. დღეს ჩვენ წერილებიც ვნახეთ. კიდევ სხვა წერილებიც არსებობს, უბრალოდ გარკვეული ეთიკა და წესები არსებობს საერთაშორისო ურთიერთობებში, რომ ყველაფერი არ გამოვაქვეყნოთ. სხვებიც არსებობს, სადაც კაია კალასი, პირდაპირ ევროკავშირის მხარე ამაყად ადასტურებს, რომ მათ შეჩერებული აქვთ საქართველოს ხელისუფლებასთან დიალოგი, საქართველოს ხელისუფლებას ისინი არ ელაპარაკებიან, მას შემდეგ, რაც ლეგიტიმურმა პარლამენტმა მიიღო კანონები. ივნისის თვეზეა საუბარი. ანუ 2024 წლის ივნისში ევროკავშირი ბრიუსელი აჩერებს დიალოგს საქართველოსთან და შემდგომ შემოდგომაზე საქართველოს ხელისუფლებას აბრალებენ იმას, რაც ივნისში გაკეთდა დიალოგის შეჩერების კუთხით", — თქვა ბოჭორიშვილმა.

შეგახსენებთ, რომ 2024 წლის 28 ივნისს ოცნების პრემიერმა, ირაკლი კობახიძემ ბრიფინგზე განაცხადა, რომ საქართველო 2028 წლის ბოლომდე არ იქნება მზად, დააყენოს ევროკავშირთან მოლაპარაკების გახსნის საკითხი.

"დღეს მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკების გახსნის საკითხი. ასევე, 2028 წლის ბოლომდე უარს ვამბობთ ყოველგვარ საბიუჯეტო გრანტზე ევროკავშირის მხრიდან.

2028 წლის ბოლო არის ის დრო, როდესაც საქართველო იქნება მზად, ეკონომიკური თვალსაზრისით სათანადოდ მომზადებული, რათა გახსნას მოლაპარაკებები 2030 წელს ევროკავშირში გასაწევრიანებლად...

ჩვენ ვაპირებთ არა მათხოვრობით და ცალ ფეხზე დგომით ევროკავშირში შესვლას, არამედ ევროკავშირში ღირსეულად გაწევრიანებას გამართული დემოკრატიული სისტემითა და ძლიერი ეკონომიკით", — თქვა ირაკლი კობახიძემ.