თბილისის მერია შობა-ახალი წლის დღესასწაულთან დაკავშირებით "საახალწლო ქალაქის" მოწყობისა და გასართობი და სანახაობრივი ღონისძიებებისთვის საჭირო საქონლისა და მომსახურების შესყიდვაზე 8 280 000 ლარს დახარჯავს.

გამარტივებული შესყიდვის დოკუმენტში წერია, რომ საახალწლო დღესასწაულები 2025 წლის 12 დეკემბერს გაიხსნება და 2026 წლის 14 იანვარს დასრულდება. "საახალწლო ქალაქი" 2025 წლის 12 დეკემბერს ცენტრალური ნაძვის ხის ანთების ცერემონიით გაიხსნება.

თბილისის მერიაში ადასტურებენ, რომ ცენტრალური ნაძვის ხე არა პარლამენტის წინ, არამედ რესპუბლიკის მოედანზე დაიდგმება.

"თბილისში, პირველი რესპუბლიკის მოედანზე განთავსდება მრავალფეროვანი თემატური დეკორაციები, მოცულობითი ინსტალაციები, ფოტოზონები, დეკორირებული ჯიხურები და დახლები, თაღები, დეკორირებული ნაძვის ხეები, საციგურაო ყინულის მოედანი შესაბამისი დეკორაციით, ქუჩების და ფასადების თემატური მორთულობები, საბავშვო-საგამოფენო პავილიონები, კულტურული, სპორტული და მოსასვენებელი სივრცეები, თოვლის ბაბუას (სანტას სახლი) და სახელოსნო. გაიმართება საახალწლო სოფლის გახსნის ღონისძიება, სხვადასხვა ჟანრის კონცერტები, ელექტრონული ლაივ-შოუები, თეატრალური წარმოდგენა-პერფორმანსები. მოეწყობა მრავალფეროვანი კულტურული, სპორტული, საგანმანათლებლო და საბავშვო-გასართობი აქტივობები, ღია კინოთეატრი, ზღაპრის გმირების მსვლელობა, ღონისძიებაზე მისულ დამთვალიერებლებს დახვდებათ თოვლის ბაბუა (სანტა) დამხმარე მსახიობებთან ერთად. მოეწყობა კვების და საგამოფენო სივრცეები, გასტრონომიული ზონები, "საშობაო ბაზარი" და "ტკბილეულის ფესტივალი". საახალწლო ღონისძიებების ფარგლებში 2025 წლის 31 დეკემბერს, გრანდიოზული საახალწლო გალა კონცერტი გაიმართება", — წერია გამარტივებული შესყიდვის დოკუმენტში.

შეგახსენებთ, რომ გასულ წელს, რუსთაველის გამზირზე მყოფმა საპროტესტო აქციის მონაწილეებმა ნაძვის ხის კონსტრუქცია აქციების დაშლის დროს დაშავებულთა ფოტოებითა და საპროტესტო ბანერებით მორთო. ამის შემდეგ, თბილისის მერიამ საახალწლო ნაძვის ხის აწყობა აქციის დაშლის შემდეგ, 8 დეკემბრის გვიან ღამე დაიწყო. 14 დეკემბერს დაანონსებული ნაძვის ხის ანთების საზეომო ცერემონია კი ჯერ 28 დეკემბერს გადადეს, საბოლოოდ კი, 16 დეკემბერს ყოველგვარი ზეიმის გარეშე აანთეს.