ოცნების პარლამენტის ადამიანის უფლებათა დაცვის კომიტეტის სხდომაზე, გახარია საქართველოსთვის ფრაქციის წევრმა, სოფო ხორგუანმა მარიამ ლაშხის ინციდენტი გაიხსენა, როდესაც ოცნების დეპუტატის საჩივრის საფუძველზე, სასამართლომ შეურაცხყოფის ბრალდებით 2 აქტივისტი სტუდენტი ციხეში გაუშვა. შემდეგ ხორგუანმა მზია ამაღლობელის საქმე ახსენა და ლაშხს განუცხადა, რომ პოლიციამ ამაღლობელს შეურაცხყოფა მიაყენა და მისგან განსხვავებით, მან თავის დაცვა ვერ შეძლო. ხორგუანმა ლაშხს შეახსენა, რომ ის საჯარო პირია და მას თმენის ვალდებულება აკისრია.

"აჭარაში ერთი შუახეველი მებრძოლი ქალია, რომელიც ასლან აბაშიძის რეჟიმის დროს იბრძოდა. ეს ქალი იბრძოდა შევარდნაძის რეჟიმის დროს, მიხეილ სააკაშვილის რეჟიმის დროს ის უფლებებისთვის იბრძოდა. რომ არა ეს ქალი, ბევრი ვერ გაიგებდა როინ შავაძის მკვლელობის შესახებ. შემდეგ ეს ქალი ამხელდა და “ქართული ოცნების“ დროს არსებული კორუფციული სქემების შესახებ საუბრობდა, რაც დადასტურდა. კორუფციის არსებობა რეალურად დადასტურდა. ახლა ეს ქალი ციხეშია, რადგან მან საკუთარი ღირსების დაცვა სცადა, როდესაც მას პოლიციელმა შეურაცხყოფა მიაყენა. როდესაც პოლიციელის მუნდირის პატივისცემასა და დაცვაზე ვსაუბრობთ, პოლიციელის მუნდირს ყველაზე დიდ შეურაცხყოფას უღირსი და მხდალი პოლიციელი აყენებს," — განაცხადა ხორგუანმა.

ლაშხმა საპასუხოდ განაცხადა, რომ მზია ამაღლობელი "კრიმინალური დამნაშავეა", ხოლო მან "ბავშვები დაიცვა". შემდეგ ლაშხმა დასძინა, რომ აშშ-სა თუ ევროპის წამყვან ქვეყნებშიც მკაცრი სამართლებრივი რეაგირება ხდება საჯარო პირისთვის შეურაცხყოფის მიყენებაზე.

"რაც შეეხება შედარებებს, ერთია კრიმინალური დანაშაული, რაც ქალბატონ მზიას შემთხვევაში მოხდა. პირველ რიგში, ეს არ იყო სილის გაწვნა, ტკივილი თუ გაწითლება. ეს იყო დამოკიდებულება ინსტიტუციის მიმართ, რის გამოც პასუხისმგებლობა დადგა. რაც შეეხება ჩემს გამოცდილებს, არ ვიცი რამდენად ადევნებდით პოლიტიკურ პროცესებს თვალს, არც ერთხელ და არც ათასჯერ ჩვენს პოლიტიკურ ლიდერებს თმენის ვალდებულების შენარჩუნება არ გასჭირვებია, მაგრამ როდესაც ეს ბავშვებს ეხება, მე როდესაც საჩივარი შევიტანე, ამით არა მხოლოდ ჩემი ბავშვები, არამედ სხვაც დავიცავი. ამით პასუხი გავეცი ქმედებებს, რისი დაკანონებაც სურდათ. ეს ჯაჭვი უნდა გაწყვეტილიყო.

პოლიტიკური ლიდერების მიმართ სიტყვიერ შეურაცხყოფასა თუ სხვა დანაშაულზე, თუ საერთაშორისო მაგალითებს გადავხედავთ, აშშ-სა თუ ევროპის წამყვან ქვეყნებში ვნახავთ, რა რეაგირებებია და როგორია გადაწყვეტილებები წლების თუ ჯარიმების მიმართ," — განაცხადა მარიამ ლაშხმა.

შეგახსენებთ, ადმინისტრაციულ სამართალდარღვევათა კოდექსში თებერვალში შესული ცვლილებით, საქართველოს სახელმწიფო-პოლიტიკური თანამდებობის პირის სიტყვიერი შეურაცხყოფა, ლანძღვა-გინება, შეურაცხმყოფელი გადაკიდება ან/და სხვაგვარი შეურაცხმყოფელი ქმედების განხორციელება სამსახურებრივი მოვალეობის შესრულების დროს ან სამსახურებრივი მოვალეობის შესრულებასთან ან საქმიანობასთან დაკავშირებით გამოიწვევს დაჯარიმებას 1500 ლარიდან 4000 ლარამდე ოდენობით ან ადმინისტრაციულ პატიმრობას 45 დღემდე ვადით.