შსს-ს განცხადებით, "სპარის" თანამშრომლებზე თავდასხმის საქმეზე დამატებით 4 პირი დააკავეს, მათ შორის ჯაკო ჩარკვიანი. განცხადებაში ვკითხულობთ, რომ ჯაკო ჩარკვიანის სახლიდან უკანონოდ შენახული ცეცხლსასროლი იარაღები ამოიღეს.

"მიმდინარე წლის 2 ნოემბერს, გვიან ღამით, ერთ-ერთმა ბრალდებულმა მანანა გიორგობიანმა სიტყვიერი შეურაცხყოფა მიაყენა თბილისში, ჩიქოვანის ქუჩაზე მდებარე სუპერმარკეტის თანამშრომლებს — 2006 წელს დაბადებულ თ.მ.-ს და 2004 წელს დაბადებულ ე.მ.-ს, რის შემდეგაც დაუკავშირდა თავის ნაცნობს -1996 წელს დაბადებულ ჯ.ჩ.-ს, რომელიც ადგილზე თანმხლებ პირებთან ერთად მივიდა, რა დროსაც მათ, სუპერმარკეტის ორი თანამშრომელი ძალის გამოყენებით გაიყვანეს გარე ტერიტორიაზე და ჯგუფურად ფიზიკურად გაუსწორდნენ.
ფაქტთან დაკავშირებით გრძელდება შესაბამისი საგამოძიებო მოქმედებები დანაშაულის ჩამდენი კიდევ ერთი პირის ადგილსამყოფლის დადგენისა და მისი სისხლისსამართლებრივ პასუხისგებაში მიცემის მიზნით.

ამასთან, სამართალდამცველების მიერ ჩატარებული საგამოძიებო მოქმედებების შედეგად, ერთ-ერთი დაკავებულის ჯ.ჩ.-ს მიერ სავარაუდოდ უკანონოდ შენახული ცეცხლსასროლი იარაღები და საბრძოლო მასალა ნივთმტკიცებადაა ამოღებული. მათ შორის: 2 ავტომატური ცეცხლსასროლი იარაღი, გლუვლულიანი თოფი და სხვადასხვა ტიპის ცეცხლსასროლი იარაღისთვის განკუთვნილი 110 ვაზნა," — ნათქვამია განცხადებაში.

გუშინ, თაკო ჩარკვიანმა "ტვ პირველს" დაუდასტურა, რომ მანჩო გიორგობიანის ჯგუფური ძალადობის საქმეში მონაწილე ერთ-ერთი პირი მამუკა ჩარკვიანის შვილი, ჯაკო ჩარკვიანია. თაკო ჩარკვიანის განცხადებით, გიორგობიანმა მის ძმისშვილს დაურეკა და შველა სთხოვა. ჯაკო (ჯანსუღ) ჩარკვიანი, მუსიკოსი მამუკა ჩარკვიანის შვილია.

შეგახსენებთ, შსს-ს ინფორმაციით, "ქართული ოცნების" მხარდამჭერი მანჩო გიორგობიანი ჯგუფური ძალადობის ბრალდებით დააკავეს. გიორგობიანთან ერთად მონაწილე 6 პირზე, კი სამართლებრივი დევნაა დაწყებული. გუშინ. გიორგობიანმა სოციალურ ქსელში სოციალურ ქსელში დაწერა, რომ შს მინისტრს, გეკა გელაძეს "ჰაერში აწევდა".