სახალხო დამცველის აპარატი ანასტასია ზინოვკინას ჯანმრთელობის მდგომარეობას ეხმაურება. აპარატის განცხადებით, სახალხო დამცველის რწმუნებულებმა ზინოვკინა დაკავებიდან დღემდე 6-ჯერ მოინახულა და "მსჯავრდადებულის მიერ წარმოდგენილი საჩივრების შესაბამისად, სხვადასხვა დროს მიმართა შესაბამის სახელმწიფო უწყებებს: შინაგან საქმეთა სამინისტროს, პროკურატურას, პენიტენციურ სამსახურს".

"31 ოქტომბერს, პატიმართან გასაუბრების შემდეგ, იმავე დღეს, აპარატმა დამატებით გამოითხოვა კონკრეტული სამედიცინო მომსახურების ამსახველი დოკუმენტის ასლი. მოცემული დროისთვის, სახალხო დამცველი აგრძელებს პატიმრის ჯანმრთელობის მდგომარეობაზე მონიტორინგს აპარატში დასაქმებული, მაღალკვალიფიციური ექიმის ჩართულობით," — ვკითხულობთ განცხადებაში.

ანასტასია ზინოვკინა ხერხემლის ტკივილს უჩივის და დიდი ხანია კლინიკაში გადაყვანას და მკურნალობას ითხოვს. 30 ოქტომბერს, ზინოვკინას მეგობარმა, ალიონა ზაიცევამ განაცხადა, რომ ანასტასიას ტკივილები იმდენად გაუსაძლისი გახდა, რომ ის საწოლიდან ვერ დგებოდა — "ღამის 9 საათზე შემოვიდა მედდა, მაგრამ ადგომაში არ დაეხმარა, პამპერსი ესროლა და გავიდა. ნასტიამ სცადა წამოდგომა, რომ პამპერსი ჩაეცვა, მაგრამ დაეცა იატაკზე და ასე იწვა ღამის 12 საათამდე".

სახალხო დამცველის განცხადებით, მათ მანდატში არ შედის მსჯავრდებულის სამედიცინო დაწესებულებაში გადაყვანა.

თბილისში მიმდინარე საპროტესტო აქციების პერიოდში სისხლის სამართლის წესით დაკავებულ რუსეთის ორი მოქალაქეს – ანასტასია ზინოვკინასა და არტემ გრიბულს 8.5-წლიანი პატიმრობა მიესაჯათ. მათ პროკურატურა გასაღების მიზნით 16 გრამი ნარკოტიკული საშუალება ალფა-პვპ-ის ფლობას ედავებოდა.

დაკავებულები აცხადებდნენ, რომ პოლიციამ მათ ნარკოტიკი ჩაუდო და საპროტესტო აქციებში მონაწილეობის გამო ისჯებიან.