2025 წლის საბავშვო ევროვიზიის სიმღერის კონკურსზე, რომელსაც თბილისი უმასპინძლებს, საქართველოს ანიტა აბგარიანი წარადგენს. 10 წლის მომღერალი პირველის არხის პროექტ რანინას მერვე სეზონის გამარჯვებული გახდა და საერთაშორისო მუსიკალურ ფესტივალზე ჩვენი ქვეყნის წარმომადგენლის სტატუსიც ასე დაიმსახურა.

ანიტა ბათუმიდანაა. სიმღერის გარდა, უყვარს ხატვა, ძერწვა, ქსოვა, ცურვა და ბულვარში ველოსიპედით სეირნობა. ოცნებობს, რომ გამოვიდეს მომღერალი, მხატვარი და მსახიობი.

"ამ გამარჯვებით მივდივარ ევროვიზიაზე და მაქვს საპასუხისმგებლო მისია", — ამბობს ანიტა, — "მე ჩემს მაქსიმუმს დავდებ, რომ კარგად წარვადგინო ევროვიზიაზე თავი".

აღსანიშნავია, რომ რანინას ისტორიაში პირველად, კონკურსის ფინალის ჟიურიში უცხოელი წევრიც იყო — ავსტრიელი სამხატვრო ხელმძღვანელი მარვინ დიტმანი, რომელსაც ევროვიზიის არაერთ ნომერზე უმუშავია. იგი ასევე იქნება წლევანდელი საბავშვო ევროვიზიის რეჟისორი.

"ეს ანიტასთვის პირველი ნაბიჯია იმ უამრავიდან, რომელიც წინ ელოდება", — აღნიშნავს დიტმანი, — "ვფიქრობ, მას ძალიან კარგად გამოუვა ყველაფერი და საქართველოს შესანიშნავად წარადგენს".

ჯერჯერობით უცნობია, რა სიმღერას შეასრულებს ანიტა აბგარიანი საბავშვო ევროვიზიის სცენაზე.

საბავშვო ევროვიზიის გამარჯვებული გასულ წელს საქართველო გახდა. ჩვენს ქვეყანას რეკორდული მეოთხე გამარჯვება 11 წლის ანდრია ფუტკარაძემ მოუტანა, გიგა კუხიანიძის სიმღერით დედას. ანდრიას გამოსვლა 16 მონაწილე ქვეყნიდან 12-მა უმაღლესი ქულით შეაფასა.

გამარჯვებიდან მალევე, საქართველოს საზოგადოებრივმა მაუწყებელმა მომდევნო ევროვიზია ჯუნიორის მასპინძლობისთვის მზადყოფნა გამოთქვა. საბოლოოდ, რიგით 23-ე საბავშვო ევროფესტივალის მასპინძლობის უფლება სწორედ თბილისს ერგო. კონკურსი, რომელშიც 18 ქვეყანა მიიღებს მონაწილეობას, 13 დეკემბერს, ახალი სპორტის სასახლის მცირე დარბაზში გაიმართება.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...